Նախագահի պաշտոնում Էրդողանը կայացրել է առաջին սխալ որոշումը. թուրքագետ

Թուրքիայի վարչապետի պաշտոնակատար Ահմեդ Դավութօղլուին Արևելագիտության ինստիտուտի տնօրեն, թուրքագետ Ռուբեն Սաֆրաստյանը համարում է ոչ թե քաղաքական գործիչ, այլ դասախոս, գիտության մարդ: Ըստ նրա, Էրդողանը նախագահի պաշտոնում արդեն հասցրել է սխալ որոշում ընդունել' Դավութօղլուին վարչապետի պաշտոնում նշանակելու հարցում: «Արմենպրես» -ի հետ զրույցում Սաֆրաստյանը նշում է, որ Դավութօղլուն տնտեսագիտությունից շատ հեռու է, իսկ նրա գաղափարներն արտաքին քաղաքականության ոլորտում բերեցին նրան, որ «Զրո խնդիր հարևանների հետ» գաղափարախոսությունը դարձավ «Զրո հարևան առանց խնդրի»:

«Իր ամբողջ ճանապարհը նա կերտել է համալսարանում' որպես պրոֆեսոր, ուսումնասիրություններ կատարել և հեռու է եղել իրական կյանքից ու քաղաքականությունից: Նրա մոտ ձևավորվել են տեսական մոտեցումներ, որոնք նա ամփոփել է իր գրքում: Այս տեսությունն իր էության մեջ, եթե սկսի իրականություն դառնալ, նշանակում է, որ Թուրքիան շարունակելու է վարել Օսմանյան կայսրության վերականգնման քաղաքականությունը, որն առաջացնում է բազմաթիվ խնդիրներ հարևանների հետ»,- ասաց Սաֆրաստյանը' հավելելով, որ երբ Դավութօղլուն նշանակվեց արտաքին գործերի նախարար և հնարավորություն ու իրավունք ստացավ իրականացնելու իր գաղափարները, Թուրքիան կանգնեց մեծագույն խնդիրների առաջ թե՛ Մերձավոր Արևելքում, թե՛ տարածաշրջանում հարևանների հետ, թե՛ այլ պետությունների հետ երկկողմ հարաբերություններում, թե՛ Թուրքիայի ներսում:

«Եվ նման տիպի քաղաքական գործչին, որ քաղաքական ասպարեզում մեծ փորձառություն չունի, նշանակել վարչապետ' խիստ ռիսկային է հենց Թուրքիայի համար: Լինելով համալսարանի պրոֆեսոր' նա տեղյակ չէ երկրի քաղաքական իրադարձություններից: Նա մի մարդ է, որ տնտեսական կրթություն չունի և տնտեսությունից հեռու է: Էրդողանի կողմից Դավութօղուի առաջադրումը որպես վարչապետ' մեծ վտանգներ է պարունակում: Եթե այս իրավիճակին հավելենք նաև այն, որ Էրդողանն անզուսպ անձնավորություն է, որը կարող է անհասկանալի և հանպատրաստից քայլեր կատարել, որոնք կարող են վտանգ հանդիսանալ ոչ միայն Թուրքիայի, այլև տարածաշրջանի այլ հարևանների համար, ապա այս երկու առաջնորդները Թուրքիան դարձնում են ավելի վտանգավոր»,- նկատեց թուրքագետը:

Ըստ Սաֆրաստյանի՝ վարչապետի պաշտոնում Էրդողանը պետք է առաջադրեր նախկին նախագահ Աբուլահ Գյուլի թեկնածությունը: Թուրքագետի բնութագրմամբ' Գյուլն ավելի շրջահայց քաղաքական գործիչ է, ավելի զգուշավոր քաղաքական գիծ ունի և շատ ավելի լավ է ծանոթ երկրում տիրող իրադարձություններին:

«Նա ավելի մեծ հեղինակություն ունի քաղաքական շրջանակներում, քան Դավութօղլուն, և նրան նշանակելն ավելի ճիշտ կլիներ»,- ասում է Սաֆրաստյանը' հավելելով, որ փաստորեն Գյուլը դուրս մնաց քաղաքական ասպարեզից, սակայն նախկին նախագահը հայտարարել է մեծ քաղաքականությունից չհեռանալու մտադրության մասին և այդ հանգամանքը, կարող է վճռորոշ լինել թե՛ Էրդողանի, թե ՛«Արդարություն և զարգացում» կուսկացության համար: