Ադրբեջանում Լեյլա Յունուսի դեմ ճնշումները շարունակվում են նաև բանտախցում

Ադրբեջանում ձերբակալված հայտնի իրավապաշտպան, Խաղաղության և ժողովրդավարության ինստիտուտի տնօրեն, ֆրանսիական «Պատվո լեգիոն» շքանշանի ասպետ Լեյլա Յունուսի դեմ ճնշումները շարունակվում են նաև բանտախցում, ինչի մասին նա նամակով տեղեկացրել է իր իրավունքների պաշտպանության կոմիտեին Բաքվի թիվ 1 քրեակատարողական հիմնարկից հղած նամակում: Այդ մասին, ինչպես հաղորդում է «Արմենպրես»- ը, ադրբեջանական «Թուրան» լրատվական գործակալությանը հայտնել է «Ազատություն» ռադիոկայանի ադրբեջանական ծառայության աշխատակից, լրագրող Խադիջա Իսմայիլովան:

Նրա խոսքով՝ Յունուսի նկատմամբ ճնշում է գործադրում նրա հետ միևնույն բանտախցում պահվող Նուրիդա Հուսեյնովան, որը նախկինում դատված է եղել բազմաթիվ անգամ:

Այդ կինը մշտապես գոռում է Յունուսի վրա և սպառնում ծեծել նրան: Լեյլա Յունուսը հայտնել է, որ այդ կնոջ դուստրը օպտիկայի խանութ ունի Բաքվի Ադրբեջան պողոտայում: Լ.Յունուսի հետ 12 քառ.մ մակերեսով բանտախցում պահվում է ևս 5 մարդ:

Կոմիտեի անդամները հայտարարել են, որ իրավապաշտպանին և կրկնահանցագործին միևնույն բանտախցում պահելն անօրինական է:

Լեյլա Յունուսին Ադրբեջանի իշխանությունները հուլիսի 30-ին ձերբակալել են պետական դավաճանության և այլ հանցագործությունների մեջ մեղադրանքներով: Amnesty International միջազգային իրավապաշտպան կազմակերպությունը Լեյլա Յունուսին ճանաչել է «խղճի բանտարկյալ»:

Լեյլա Յունուսի իրավունքների պաշտպանության կոմիտեի ղեկավար Ջամիլ Հասանլին այսօր Բաքվում հայտարարել է, որ իրավապաշտպանների, հասարակական ակտվիստների և լրագրողների ձերբակալություններով իշխանություններն ընդդիմության նկատմամբ ճնշում են գործադրում՝ օգտագործելով զրպարտություններ, ստեր և կեղծարարություններ: Նա ասել է, որ նման «մեղադրանքներով» երեկ ձերբակալվել է նաև «Ազադլըգ» թերթի թղթակից Սեյմուր Հազին:

Անդրադառնալով Նախիջևանում իրավապաշտպան Իլգար Նասիբովի գազանային ծեծին՝ Ջամիլ Հասանլին ասել է, այդ բոլորը ֆաշիստական Գերմանիայի մեթոդներ են, որոնք հրեաների դեմ կիրառվել են անցյալ դարի 30-ական թվականներին: Նա նշել է, որ Forbes հանդեսը Ադրբեջանում մարդու իրավունքների հետ կապված աղետալի իրավիճակը համեմատել է Հյուսիսային Կորեայում առկա բռնատիրական ռեժիմի հետ:

Ջամիլ Հասանլին հայտնել է, որ Լեյլա Յունուսի իրավունքների պաշտպանության կոմիտեն մտադիր է բարեգործական մարաթոն անցկացնել քաղբանտարկյալներին օգնություն ցուցաբերելու համար:

Ի դեպ՝ Նախիջևանում գազանային ծեծի ենթարկված Իլգար Նասիբովը բուժման նպատակով այսօր մեկնել է Թուրքիա: Սահմանն անցնելուց հետո նրան շտապ օգնության մեքենայով տարել են Վանի հիվանդանոցներից մեկը:

Իլգար Նասիբովը օգոստոսի 21-ի երեկոյան գազանային ծեծի էր ենթարկվելՈչ կառավարական կազմակերպությունների և ժողովրդավարության Ռեսուրսային կենտրոնում: Նրա կինը, ով ևս իրավապաշտպան է, ԶԼՄ-ներին հայտնել է, որ ամուսնուն ծեծի են ենթարկել Նախիջևանի անվտանգության նախարարության աշխատակիցները: Տեղական և միջազգային դեմոկրատական հանրությունը զայրութ է հայտնել այդ դաժան ակտի առնչությամբ՝ գնահատելով դա որպես իշխանությունների վրեժ՝ Նախիջևանում մարդու իրավունքների խախտումների բացահայտման համար: Նախիջևանի իրավապահ մարմիններն անգամ քրեական գործ չեն հարուցել Նասիբովին ծանր մարմնական վնասվածք հասցրած անձանց հայտնաբերելու և պատժելու համար: