Արցախում նշում են Անկախության հռչակման 23-րդ տարեդարձը

Արցախում անկախության տոնի մեկնարկը կտրվի վաղ առավոտյան, մայրաքաղաք Ստեփանակերտում, որտեղ Արցախի իշխանությունների ներկայացուցիչները, մտավորականներն ու քաղաքական գործիչները կայցելեն հուշահամալիր և ծաղկեպսակներ կդնեն զոհված ազատամարտիկների, զինվորների և ԼՂ առաջին նախագահ Արթուր Մկրտչյանի շիրիմին։ «Արմենպրես»-ի փոխանցմամբ, նախատեսված է նաև պարգևատրման արարողություն, որից հետո Ստեփանակերտում կանցկացվեն տոնական տարատեսակ միջոցառումներ և շքերթներ:

Արցախի անկախության հռչակման 23-րդ տարեդարձի առթիվ Մշակույթի և երիտասարդության հարցերի նախարարության նախաձեռնությամբ անցկացվելու են մի շարք տոնական միջոցառումներ: Մշակույթի նախարարությունից «Արմենպրես»-ին հավաստիացրին, որ տոնական մթնոլորտն ապահովված է լինելու: «Ստեփանակերտի Ստեփան Շահումյանի անվան պուրակում տեղի կունենա արցախյան գորգերի ցուցադրություն: Այցելուին ներկայացնելու ենք ինչպես Երկրաբանական թանգարանի հին, այնպես էլ «Ղարաբաղ Կարպետ»-ի ստեղծած նոր գորգերը»,- փոխանցեցին ԼՂՀ մշակույթի նախարարությունից' հավելելով, որ քաղաքի տարբեր անկյուններում կանցկացվեն միջոցառումներ, բացօթյա համերգներ: Տոնական միջոցառումները կուղեկցվեն ազգային պարերի ներկայացմամբ:

Երեկոյան տոնական միջոցառումները կեզրափակվեն Վերածննդի հրապարակում կայանալիք տոնական համերգով, որին կմասնակցեն Արցախի և Հայաստանի երգիչ-երգչուհիները:

ԼՂՀ նախագահի մամուլի խոսնակ Դավիթ Բաբայանն ասաց, որ սեպտեմբերի 2-ով հայոց պետականության պատմության մեջ նոր էջ բացվեց և կերտվեց հայկական երկրորդ հանրապետությունը: «Մենք պետք է Արցախի անկախությունը դիտարկենք որպես հայոց պետականության անբաժան մի մաս, ոչ թե անջատենք Արցախն ու հայոց պատմությունը: Սա մեր ընդհանուր պատմության մի կարևոր էջն է»,- ասաց նա:

Ստեփանակերտում այսօր կայանալիք միջոցառումներին կմասնակցեն նաև Լիտվայի Սեյմի Լիտվա-Արցախ բարեկամության խմբի անդամ- պատգամավորները: