Հանուն ում են հավաքագրվում ազատամարտիկները

«1990-ականների սկզբին ժամանակի հրամայականով ստեղծվեց «Երկրապահ» կամավորականների միությունը, որի կազմում ընդգրկվեցին Ղարաբաղյան ազատագրական պայքարի մասնակից ազատամարտիկները, զինվորականներն ու կամավորները: Տարիների ընթացքում կառույցն ընդլայնվեց, կայացավ, ստեղծեց տարածքային կառույցներ ու տարբեր մարմիններ, որոնք զբաղվում են ազատամարտիկների և նրանց ընտանիքի անդամների խնդիրներով: Չնայած դրան, ժամանակ առ ժամանակ ի հայտ են գալիս ԵԿՄ-ի որոշ անդամներ կամ նախկին ազատամարտիկներ, ովքեր փորձում են նեղ անձնական կամ քաղաքական շահերից ելնելով պառակտել միությունը, դրա անդամների մի մասին առանձնացնել ԵԿՄ-ից ու ստեղծել նոր կազմակերպություններ: Նախկինում այդպիսի մի քանի անհաջող փորձեր կատարվեցին' ի դեմս «Ոգու փորձության» և «Ազատամարտի վետերանների միության», սակայն այդ կառույցների ստեղծման իրական նպատակների ի հայտ գալուց կարճ ժամանակ անց դրանք այդպես էլ մնացին թղթի վրա»: Գրում է «Իրավունք» թերթը:

«Այժմ էլ սկսվել է ԵԿՄ-ի դեմ նմանատիպ հերթական արշավն ու ազատամարտիկների հավաքագրումը, որը գլխավորում են ԱԺ ԲՀԿ խմբակցության պատգամավորներ Ռուստամ Գասպարյանը և Ռուբեն Գևորգյանը: Ինչպես հայտնի է, սկզբում նրանք ստեղծեցին «Ազատամարտի նվիրյալների միություն» հասարակական կազմակերպությունը, որը մի քանի օրվա կյանք ունեցավ, քանի որ, ինչպես նշում են իրազեկ մարդիկ, ԲՀԿ-ականները չկարողացան բարիշել փողի հարցում, այսինքն մեկը մյուսին չզիջեց տրամադրվող գումարների վերահսկումն ու բաշխումը: Իսկ խոստացված և սկզբնական շրջանում տրամադրված գումարները բավականին մեծ էին: Դրանից որոշ ժամանակ անց, չհրաժարվելով իրենց մտադրությունից, նրանք իբր առանձնացան ու ստեղծեցին երկու նոր կառույց. Ռուստամ Գասպարյանը' «Ազատամարտիկների դաշինք», իսկ Ռուբեն Գևորգյանը' «Երդվյալ ազատամարտիկների միություն»: Ռ. Գասպարյանն ու Ռ. Գևորգյանը Երևանում և մարզերում ազատամարտիկների հետ անցկացնում են հանդիպումներ' նրանց համոզելով անդամագրվել նորաստեղծ կազմակերպություններին: Նրանք երկուսն էլ հայտարարում են, որ իրենց կազմակերպություններն ապաքաղաքական են և որևէ կուսակցության' հատկապես ԲՀԿ-ի հետ առնչություն չունեն:

Այն, որ այս երկու նորաստեղծ կառույցներն էլ ֆինանսավորվում ու ղեկավարվում են նույն կենտրոնից և որ դա ԲՀԿ-ն է, կասկածից վեր է, քանզի առկա են դա հիմնավորող բազմաթիվ տեղեկություններ: Նախ ԲՀԿ-ական պատգամավորները լավագույն ցանկության դեպքում անգամ չեն կարող ինքնագլուխ ձեռնարկներով զբաղվել, այն էլ հավաքագրել ազատամարտիկների: Ուշադիր ընթերցողները նկատած կլինեն, որ ԲՀԿ-ական պատգամավորների այս գործունեությունը լուսաբանում են բացառապես ԲՀԿ-ին պատկանող լրատվամիջոցները' «Կենտրոն» հեռուստաընկերության գլխավորությամբ: Նույն մամուլի հրապարակումներից հայտնի է, որ Ռ.Գասպարյանի «Ազատամարտիկների դաշինքը» հավաքներ է անցկացնում «Հայրենիք» կինոթատրոնի շենքում, որտեղ ունի նաև գրասենյակներ, իսկ այդ տարածքն, ինչպես հայտնի է, պատկանում է Շենգավիթի նախկին թաղապետ «Կադիլակ Սերոժին»: Գաղտնիք չէ, որ 2012թ. ԱԺ ընտրություններից առաջ այդ նույն տարածքում է տեղակայված եղել ԲՀԿ-ի նախընտրական շտաբը և ինչպես այն ժամանակ, այնպես էլ «Ազատամարտիկների դաշինքի» դեպքում, տարածքի սեփականատերը վարձակալության գումար չի վերցնում' դրանով իսկ փորձելով հաճոյանալ ԲՀԿ-ին:

Բացի այդ, շրջանառվող լուրերի համաձայն, Ռ.Գասպարյանն ու Ռ.Գևորգյանը առանձին-առանձին հանդիպումներ են ունենում ԲՀԿ ղեկավարության հետ, ներկայացնում իրենց կատարած աշխատանքների հաշվետվությունը (թե ով քանի ազատմարտիկ է հավաքագրել) և ըստ ձեռքբերած արդյունքների էլ ստանում են ֆինանսավորման հերթական մասը: Հետաքրքիր է, արդյո՞ք այդ կառույցներին անդամագրվող ազատամարտիկները տեղյակ են, թե իրենց սոցիալական խնդիրները լուծելու պատրվակով որքան գումար է տրվում: Դժվար թե:

Ազատամարտիկներին օգնելու պատրվակով լրացուցիչ դիվիդենտներ ապահովելուց բացի, ԲՀԿ-ական պատգամավորները հետապնդում են նաև այլ նպատակներ, որոնք իրենց առջև դրել է կուսակցությունը: Բանն այն է, որ այս երկու կառույցների ձևավորումն ընթանում է բավականին արագ տեմպերով և դա ունի իր պատճառները: Պարզվում է, որ «քառյակի» մաս կազմող ԲՀԿ-ի պատգամավորները ազատամարտիկների հետ հանդիպումների ժամանակ հատուկ նշում են, որ իրենք պետք է կազմավորվեն, համախմբվեն ու մոբիլիզացվեն մինչև սեպտեմբերի վերջ, ինչից հետո պետք է ցանկացած պահի պատրաստ լինեն ակտիվ գործողությունների: Պատգամավորները մարզերի ազատամարտիկներին նաև վստահեցրել են, որ կհոգան Երևան գալու և մնալու հետ կապված բոլոր ծախսերը:

Արդեն հայտնի է՝ տխրահռչակ «12 կետերի» կատարման ընթացքի պատրվակով «քառյակը» սեպտեմբերի վերջին նախատեսում է Երևանում անցկացնել մեծ հանրահավաք: Ինչպես նկատեցիք, ակտիվ գործողությունների պատրաստվելու համար ազատամարտիկներին տրված ժամկետն ու «քառյակի» հանրահավաքի անցկացման օրը համընկնում են, ինչը պատահականություն չէ և հերթական անգամ հիմնավորում է ԲՀԿ-ի ու այդ կառույցների միջև եղած կապը:

Եթե ամփոփենք վերը նշված փաստերն ու հանգամանքները, ապա ստացվում է, որ «քառյակի» մաս կազմող ԲՀԿ-ն կուսակցության անդամներին տրամադրում է ֆինանսական միջոցներ' ազատամարտիկներ հավաքագրելու և սեպտեմբերի վերջին նրանց ակտիվ գործողությունների նախապատրաստելու համար: Արդեն իսկ պարզ է, որ այդ ազատամարտիկներին հրահանգվելու է մասնակցել «քառյակի» սեպտեմբերյան հանրահավաքին, սակայն միթե՞ նրանք չեն հասկանում, թե իրենց դեպի ուր են տանում, ինչպես են պատրաստվում օգտագործել, ինչ խաղերի մեջ են ներքաշում: Ակնհայտ է, որ այս ամբողջ գործընթացի նպատակն է հանրահավաքի ընթացքում ուժի դիրքերից հանդես գալն ու իշխանություններին ինչ-որ բաներ պարտադրելու փորձ կատարելը:

Մի բան է անհասկանալի, թե ինչի՞ դեմ պայքարելու համար են մոբիլիզացվում նախկին ազատամարտիկները, ու՞մ հանդեպ են պատրաստվում ակտիվ գործողություններ իրականացնել. սեփական ժողովրդի՞, շարքային քաղաքացիների՞, թե՞ հասարակական կարգը հսկող իրավապահների դեմ: Եվ հանուն ում են հավաքագրվում ազատամարտիկները – Ռոբերտ Քոչարյանի ու Լևոն Տեր-Պետրոսյանի, թե ամերիկացիների ու եվրոպացիների, թե՞….Ամեն դեպքում, այս «ավանտյուրան» իր մեջ վտանգներ է պարունակում և պարզ չէ' դրա հեղինակները գիտակցելո՞վ, թե՞ «միամտաբար» այլ ուժերի կողմից օգտագործվելով են դրան գնում: Չնայած, դա այնքան էլ կարևոր չէ, քանի որ հային հայի դեմ հանելու գաղափարն ինքնին դատապարտելի երևույթ է' անկախ նրանից, թե դա ինչ նպատակներ է հետապնդում»: