Ֆրանսահայ երգչի երազանքը (տեսանյութ)

Լուրեր.com-ի զրուցակիցն է ֆրանսահայ երգիչ Համլետ Կոչեցյանը: Համլետը 1997-ից բնակվում է Ֆրանսիայի Մարսել քաղաքում: Այնտեղ նա կազմել է ընտանիք, ունի հրաշալի բալիկներ: Ֆրանսիահայ երգիչն իր երաժշտական գործունեությունը ծավալել է Մարսելում, բայց ունի նվիրական երազանք` հայրենիքում՝ հայ հանդիսատեսի առջև ներկայանալ: 

Քանի՞ տարեկան էիք, երբ սկսեցիք զբաղվել երգարվեստով:

Երգարվեստով սկսել եմ զբաղվել 15 տարեկանից:

Կպատմե՞ք առաջին բեմելի և հետագա մասնագիտական գործունեության մասին:

Երբ առաջին անգամ Մարսելում բեմ բարձրացա, շատ տպավորիչ և անբացատրելի զգացողություններ ունեի: Առհասարակ, ինչպես ցանկացած ոլորտ, այդպես էլ երաժշտությունը, անընդմեջ աշխատանք է պահանջում: Ես էլ փորձում եմ անդադար աշխատել, որպեսզի նոր ու գեղեցիկ աշխատանքով ներկայանամ իմ հանդիսատեսին:

Ո՞րն էր Ձեր առաջին երգը, որով ճանաչում ստացաք և սիրվեցիք հանդիսատեսի կողմից: Կպատմե՞ք այդ երգի ստեղծման և գրանցած հաջողությունների մասին:

Առաջինը հանդիսատեսին ներկայացել եմ «Եկել եմ» երգով: Երգի հեղինակը Վաչե Ավեյանն է, գործիքավորումը՝ Արթուր Բուռնուչյանինը: Երկուսն էլ շատ տաղանդավոր անձնավորություններ են: Խորին շնորհակալությունս՝ նրանց:

Իսկ առաջին հաջողությունս գրանցվել է «Լավագույն տասնյակ» հաղորդաշարում:

Ո՞րն է Ձեր հաջողության գրավականը:

Կարծում եմ՝ հաջողությանս գրավականն իմ երգելաոճն է:

Տեսահոլովակ, ձայնասկավառակ, համերգային ծրագիր. ի՞նչ նորությունների սպասեն երկրպագուները:

Արդեն պատրաստ է իմ առաջին տեսահոլովակը «Եկել եմ» երգի հիման վրա: Այժմ զբաղված ենք նոր ձայնասկավառակի թողարկման աշխատանքներով: 

Առաջիկայում Հայաստան վերադառնալու, այստեղ ստեղծագործելու և հայ հանդիսատեսին ներկայանալու ծրագրեր կա՞ն :

Ունեմ մեծ երազանք Հայաստանում` իմ հանդիսատեսի առջև ներկայանալու, ունեմ նպատակ` Հայաստանում տեսանյութ նկարահանելու:

Աստծո օրհնությամբ, ցանկանում եմ գործունեություն ծավալել նաև Հայաստանում: 

Գտե՞լ եք նրան, ում կողքին երջանիկ եք, եթե ոչ, ապա ինչպիսի ՞ն նա պետք է լինի:

Այո, ես գտել եմ իմ կյանքի ընկերոջը, ունեմ երջանիկ ընտանիք և հրաշալի բալիկներ: