Լուսառատում հիմնանորոգված դպրոց է բացվում

Արարատի մարզի Լուսառատ համայնքում սեպտեմբերի 4-ին տեղի կունենա ամբողջովին հիմնանորոգված միջնակարգ դպրոցի բացման արարողությունը: Հանդիսավոր օրվա կապակցությամբ, բացման պաշտոնական արարողությանը ներկա կլինեն մարզպետ Ռուբիկ Աբրահամյանը, Կարմիր Խաչի ղեկավար Մխիթար Մնացականյանը, հյուրեր Երևանից, շրջակա համայնքներից:

Դպրոցի հիմնանորոգումը կատարվել է Ճապոնիայի կառավարության և Հայկական կարմիր խաչի ընկերության միջոցներով: Դպրոցի հիմնանորոգման աշխատանքները սկսվել են չորս ամիս առաջ, ինչի համար ներդրվել է 90 հազար դոլար: Առաջին և երկրորդ հարկերը կահավորված են դպրոցական նոր սեղաններով և աթոռներով, գույքով, ունեն առանձին սանհանգույցներ, ճաշակով ձևավորված հանդիսությունների դահլիճ:

Ինչպես «Արմենպրես»-ին տեղեկացրեց Լուսառատ համայնքի գյուղապետ Դանիել Հակոբյանը, ավելի քան 300 աշակերտ ունեցող դպրոցի համար կարևորագույն նշանակություն ունի այս մասնաշենքի առաջին և երկրորդ հարկերի հիմնանորոգումը, քանի որ երկրորդ մասնաշենքն ամբողջովին վթարային է, և այնտեղ դադարեցված են դասերը: Նախնական տվյալներով, երկրորդ մասնաշենքի հիմնանորոգման համար անհրաժեշտ է 30 մլն դրամ:

Լիլիթ Մաճկալյան