Աշխատանքի և սոցհարցերի նախարարության աշխատակիցներն այցելել են երեխաների խնամքի և պաշտպանության հաստատություններ

Գիտելիքի օրվա կապակցությամբ շարունակվում են այցելությունները սոցիալական պաշտպանության համակարգի երեխաների խնամքի և պաշտպանության հաստատություններ` ծանոթանալու նրանց գործունեությանը, ձեռքբերումներին, կատարված աշխատանքներին, խնդիրներին: Սեպտեմբերի 2-ին ՀՀ ԱՍՀ նախարարի տեղակալ Սոնա Հարությունյանն այցելել է Գավառի մանկատան սաներին:

Սոնա Հարությունյանը տնօրենի ուղեկցությամբ ծանոթացել է հաստատության շենքային և կենցաղային պայմաններին, այցելել է գորգագործության, կարպետագործության արհեստանոցներ, համակարգչային կենտրոն և գրադարան: Գրի և դպրության օրվա առիթով շնորհավորելով սաներին՝ տիկին Հարությունյանը հորդորել է շատ կարդալ և ցուցաբերել բարձր առաջադիմություն: Նա երեխաներին Աստվածաշունչ, ՀՀ սահմանադրության և հեքիաթների գրքեր, Ցեղասպանության մասին պատմող վավերագրական նյութերի սկավառակներ է նվիրել: «Նախարարության ուշադրության կենտրոնում են գտնվում երեխաների խնամք ու պաշտպանություն իրականացնող կենտրոնները: Հավաստիացնում եմ, որ իրագործվող ծրագրերն ու բարեփոխումները այս ոլորտում լուրջ ձեռքբերումներ կարձանագրեն: Ես վերջին անգամ Գավառի մանկատուն այցելել եմ տաս տարի առաջ և այս տևականժամանակահատվածում փոփոխությունները տեսանելի են», -իր խոսքում նշել է տիկին Հարությունյանը:

Գավառի մանկատանը ներկայում խնամվում է շուրջ 70 երեխա, որտեղ իրականացվում է 3-18 տարեկան առանց ծնողական խնամքի մնացած երեխաների շուրջօրյա խնամքի կազմակերպումը` ստեղծելով ընտանեկանին մոտ պայմաններ և առաջնորդվելով անհատական մոտեցմամբ: Մանկատունը ապահովում է դպրոցահասակ երեխաների կրթությունը հանրակրթական դպրոցներում, ինչպես նաև իրականացնում է երեխայի մասնագիտական կողմնորոշմանն ոււղղված աշխատանքներ` հաշվի առնելով անձի նախասիրությունները, հետաքրքրություններն ու ընդունակությունները:

ՀՀ ԱՍՀ նախարարի տեղակալ Ֆ. Բերիկյանն էլ այցելել է Երևանի երեխաների խնամքի և պաշտպանության թիվ 2 գիշերօթիկ հաստատություն, որտեղ համապատասխան ծառայություններ են մատուցվում սոցիալապես անապահով, ընտանիքների անապահովության գնահատման համակարգում հաշվառված ընտանիքների շուրջ 90 դպրոցահասակ երեխայի: Ապահովվում է կրթության գործընթացը, լուծվում մասնագիտական կողմնորոշման և աշխատանքի տեղավորման խնդիրները` համագործակցելով պետական մարմինների և գործատուների հետ:

Պարոն Բերիկյանը ևս ծանոթացել է հաստատության գործառույթներին, առանձնահատկություններին, խնամքի կազմակերպման աշխատանքներին, ապագա անելիքներին: Նա նշել է, որ նմանատիպ այցերը լինելու են շարունակական և նպատակային:

Երեխաների իրավունքների պաշտպանության ոլորտում շարունակվում են բարեփոխումները՝ հիմքում ունենալով «Երեխան պետք է ապրի ընտանիքում» սկզբունքը:

Կատարված ուսումնասիրությունների արդյունքում կփոխվեն հաստատությունների գործունեության ձևերը, չափորոշիչները, մատուցվող ծառայությունների բովանդակությունն ու որակը: