«Չի կարելի հանդուրժել միջազգային իրավունքի փոխարինումը ուժի իրավունքով». Յոակիմ Գաուկ

Երկրորդ համաշխարհային պատերազմի մեկնարկը հիշատակելու համար Լեհաստանի և Գերմանիայի նախագահներ Բրոնիսլավ Կոմորովսկին և Յոակիմ Գաուկը 2014թ-ի սեպտեմբերի 1-ին հանդիպել են Վեստեր պլատտեում, որտեղ էլ հենց 75 տարի առաջ հնչել են Երկրորդ աշխարհամարտի առաջին կրակոցները: 1939թ.-ի սեպտեմբերի 1-ին Լեհաստան գերմանական զորքերի ներխուժմամբ սկսվեց Երկրորդ համաշխարհային պատերազմը՝ մարդկության պատմության ընթացքում ամենաշատ կյանքեր խլած ռազմական հակամարտությունը: Ինչպես «Արմենպրես»-ին տեղեկացրին Հայաստանում Լեհաստանի դեսպանատնից, իր ելույթում Լեհաստանի նախագահը նշել է պատմական փորձառության կարևորությունը մեր օրերում, երբ Եվրոպական միությունից դեպի արևելքում նոր սպառնալիքներ են ի հայտ եկել: «Մեր աչքի առաջ ռազմական միջոցներ են օգտագործվում մեր հարևանի նկատմամբ: Միջազգային իրավունքն ու քաղաքակիրթ աշխարհի նորմերը խախտվում են գիտակցաբար և ցինիկաբար»,- նշել է Բրոնիսլավ Կոմորովսկին:

Գերմանիայի նախագահ Յոակիմ Գաուկն իր հերթին հիշատակել է այն ողջ սարսափն ու դաժանությունը, որ ստիպված են եղել կրել տարբեր ժողովուրդներ Երկրորդ աշխարհամարտի տարիներին: Նրա խոսքով, այսօր էլ Եվրոպան մեծ մարտահրավերների առաջ է կանգնած, ուստի և այն պետք է միացյալ մնա: «Միայն միասին կարող ենք հաջողության հասնել ժողովրդավարական և խաղաղ Եվրոպայի կառուցման հարցում: Եվ միայն միասին կարող ենք այն պաշտպանել»,- ամփոփել է Յոակիմ Գաուկը: Նա նաև շեշտել է, որ չի կարելի հանդուրժել միջազգային իրավունքի փոխարինումը ուժի իրավունքով: «Մենք ամուր կանգնած ենք բոլոր նրանց դեմ, ովքեր խախտում են միջազգային իրավունքը, բռնակցում են այլ պետություններին պատկանող տարածքներ կամ ռազմական աջակցություն են ցուցաբերում այլ պետություններում անջատականություն ստեղծելու համար»,- նշել է Գաուկը:

Երկու երկրների ղեկավարները նաև անդրադարձ են կատարել լեհ-գերմանական հաշտեցման գործընթացին՝ ընգծելով երկու ժողովուրդների կամքը հաղթահարելու պատմական խնդիրները՝ հանուն միասնական եվրոպական ապագայի: