ԱՄՆ-ը 200 զինվորական կուղարկի Ուկրաինայի զորավարժություններին

«Արագ եռաժանի 2014» (Rapid Trident 2014) զորավարժություններին կմասնակցեն աշխարհի 15 երկրների շուրջ 1,3 հազար զինվորականներ: Այդ մասին, ինչպես տեղեկացնում է «Արմենպրես»-ը, ԻՏԱՌ-ՏԱՍՍ-ին հայտնել է ԱՄՆ-ի զինված ուժերի եվրոպական հրամանատարության ներկայացուցիչ Գրեգորի Հիքսը:

«Արագ եռաժանի» զորավարժությունները պետք է անցկացվեն սեպտեմբերի 16-ից մինչև 26-ը»,- ասել է Հիքսը: Նրա խոսքով՝ դրանց կմասնակցեն «մոտավորապես 1,3 հազար զինծառայողներ 15 երկրներից, ներառյալ Ուկրաինան, Ադրբեջանը, Բուլղարիան, Կանադան, Վրաստանը, Գերմանիան, Մեծ Բրիտանիան, Լատվիան, Լիտվան, Մոլդովան, Նորվեգիան, Լեհաստանը, Ռումինիան, Իսպանիան և ԱՄՆ-ը, ինչպես նաև ՆԱՏՕ-ի ներկայացուցիչները»:

Նախատեսվում է, որ վարժանքները տեղի կունենան Ուկրաինայի Լվով քաղաքի մերձակայքում:

ԱՄՆ-ի պետդեպարտամենտի պաշտոնական ներկայացուցիչ Ջեն Փսակին սեպտեմբերի 3-ին կայացած ճեպազրույցի ժամանակ հավաստել է, որ զորավարժություններին կմասնակցեն ամերիկացի 200 զինվորներ: