Ադրբեջանական ԶԼՄ-ների արխիվներից հանվում են բանակի օգոստոսյան կորուստների մասին լուրերը

Ադրբեջանում ԶԼՄ-ների նկատմամբ գրաքննություն մտցնելու վերաբերյալ նախագահի աշխատակազմի ղեկավար Ռամիզ Մեհտիևի գոստոսի 29-ին ունեցած հայտնի ելույթից հետո այդ երկրի օլիգարխներին պատկանող ԶԼՄ-ների արխիվներից սկսել են հանվել օգոստոսի սկզբին Հայաստանի և Լեռնային Ղարաբաղի հանրապետությունների հետ Ադրբեջանի սահմաններում ադրբեջանական բանակի դիվերսիոն գործողությունների ժամանակ կրած կուրուստների վերաբերյալ լուրերը:

Ռամիզ Մեհտիևը ադրբեջանական թերթերի, էլեկտրոնային ԶԼՄ-ների և օլիգարխներին պատկանող ԶԼՄ-ների խմբագիրների հետ անցկացրած հավաքում նրանց խստորեն քննադատել էր օգոստոսի սկզբին հայկական զորքերի հետ շփման գծում ադրբեջանական բանակի կողմից իրագործված դիվերսիոն գործողություններում խայտառակ պարտության արդյունքում կրած կորուստների վերաբերյալ հրապարակումներ անելու համար և հայտարարել, որ «այդ բոլորը երկրի թշնամիների կողմից օգտագործվում է տեղեկատվական պատերազմում», ինչը վտանգում է «գլոբալ մարտահրավերների պայմաններում Ադրբեջանի «տեղեկատվական անվտանգությանը»:

Ինչպես հաղորդում է «Արմենպրես»-ը, ներիշխանական աղբյուրը «Ազադլըգ» թերթին հայտնել է, որ Մեհտիևի այն արտահայտությունից հետո, թե իրեն հայտնի է այն ոչ ընդդիմադիր ԶԼՄ-ների անունները, որոնք հանդես են եկել նման հրապարակուններով, օլիգարխները դա ընդունել են որպես իրենց արված զգուշացում և անմիջապես կարգադրել կայքերի արխիվներից ջնջել օգոստոսյան «փոքրիկ պատերազմի» հետ կապված լուրերը:

Ադրբեջանում 1990-ականների կեսերից ազատ ԶԼՄ-ները խեղղդելու և դրանց վրա վերահսկողություն սահմանելու քաղաքականությունն իրագրծվում էր նախագահականի կողմից, բայց 2004 թվականից սկսած նկատվում է օլիգարխների կողմից ԶԼՄ-ների ստեղծման իրարանցում և նրանց վրա կենտրոնացված վերահսկողության աստիճանական կորուստ, ինչը պարզորոշ դրսևորվում է վերջին շրջանում նախագահ Ալիևի ձեռքում քաղաքական-տնտեսական իշխանության կենտրոնացման ֆոնի վրա:

«Այն մասին, որ «գլոբալ մարտահրավերների պայմաններում տեղեկատվական անվտանգության» թեման Մեհտիևի համար ընդամենն իր ընդդիմախոսներին ուղերձներ հղելու հարթակ է, վկայում է այն փաստը, որ նրա հետ հանդիպման եկած իշխանամետ ԶԼՄ-ների խմբագիրներին չի ներկայացվել գործողությունների և հանձնարարականների կոնկրետ պլան, քանի որ այն չի պատրաստվել անհրաժեշտության բացակայության պատճառով», -գրում է թերթը:

«Թուրան» լրատվական գործակալության տնօրեն Մեհման Ալիևը «Ամերիկայի ձայն» ռադիոկայանին տված հարցազրույցում Մեհտիևի ելույթի հետ կապված հայտարարել է, որ իշխանամետ ԶԼՄ-ներին պետությունը տարեկան 20-30 մլն մանաթ ոչ պաշտոնական խրախուսում է հատկացնում: