«Հրապարակ».Արթուր Բաղդասարյանը թերթ էլ ունեցավ

ՕԵԿ ղեկավար Արթուր Բաղդասարյանն ընդդիմության դաշտում իր խոսքերը տեղ հասցնելու և մյուսներից հետ չընկնելու նկրտումներով փորձում է քարոզչական միջոցներ ստեղծել:

Արդեն մի քանի ամիս է, ինչ ՕԵԿ թիմը քրտնաջան աշխատում է սեփական հեռուստաալիք ունենալու խնդրի վրա: Ի դեպ «Երեւան» TV-ին «Հ3» դառնալու ճանապարհին է:

Երեկ Բաղդասարյանի հովանավորությամբ լույս տեսած «Հարթակ» թերթի անդրանիկ համարի շնորհանդեսն էր: Թերթի գաղափարը, ինչպես ասաց խմբագիրը, ծնվել է մեկ շաբաթ առաջ, ու մեկ շաբաթ անց հասցրել են համար թողարկել: Ի դեպ, չնայած որոշել էին շռնդալից շնորհանդես կազմակերպել եւ դրանով ցույց տալ, որ լրատվական դաշտում նոր «խաղացող» է հայտնվում, եւ այդ նպատակով հրավիրել էին գրեթե ողջ քաղաքական ու լրատվական դաշտին, սակայն հրավերն ընդունել էին քչերը, եւ շնորհանդեսին ներկա 20-30 հոգուց հանրահայտ դեմքերը ԲՀԿ խմբակցության պատգամավոր, մամլո խոսնակ Տիգրան Ուրիխանյանն էր, ԱԻՄ առաջնորդ Պարույր Հայրիկյանը, հանրահայտ Անի Զախարյանը, «Արաբոյի» Մանվել Եղիազարյանը, դերասան Տիգրան Ներսիսյանը եւ մի երկու անհայտ ՀԿ-ի ղեկավար:

Մյուսները ՕԵԿ ջահելներն էին ու միջոցառումը լուսաբանելու եկած լրագրողները: Թերթի խմբագիրը ֆեյսբուքյան ակտիվիստ, «Աշխատավորների շահերի պաշտպանության շարժում» ՀԿ ղեկավար Կարեն Թումանյանն է:

Նախաձեռնությունն առաջինը ողջունելու մղվեց իրեն քաղաքական դաշտի լիիրավ անդամ համարող Անի Զախարյանն ու արձանագրեց, որ «լրատվական դաշտն իսկապես լղոզված է, եւ մենք հրամայականն ունենք ինտելեկտուալ լրատվականի»

Փայլփլուն օձի կաշվից փեշով ու վարդագույն վարդերով շապիկով Անի Զախարյանը հետո սկսեց դասեր տալ լրագրողներին՝ հորդորելով զերծ մնալ «շոուբիզնեսական» մոտեցումից.

«Շատ հաճախ լրագրողներին թվում է, թե քաղաքականությունը, որը նույնն է, թե պետականաշինությունը, դա ինչ-որ շոու-բիզնես է, բայց դա այլ ոլորտ է, իսկ քաղաքական գործչի հետ շփման ժամանակ հարցերը պետք է լինեն միմիայն պետականաշինությանը նպաստելու ուղղվածությամբ»,- ասել է նա:

Շարունակությունը՝ «Հրապարակ»-ի այսօրվա համարում: