ԱԳ փոխնախարարը մասնակցել է ԵՄ Արևելյան գործընկերության հանդիպմանը

ՀՀ արտաքին գործերի նախարարի տեղակալ Կարեն Նազարյանը սեպտեմբերի 5-ին Ստոկհոլմում մասնակցել է Արևելյան Գործընկերության երկրների փոխարտգործնախարարների ոչ-պաշտոնական հանդիպմանը, որը նախաձեռնվել էր Շվեդիայի արտաքին գործերի նախարարության կողմից։

Հանդիպման նպատակն էր քննարկել Արևելյան Գործընկերության ծրագրի շրջանակներում երկկողմ և բազմակողմ համագործակցության հարցերը Ռիգայի գագաթաժողովին ընդառաջ։ Առանձնակի ուշադրություն է դարձվել ԱլԳ ձևաչափով ծրագրերի բազմազանեցման հնարավոր ուղղություններին։

Քննարկումներում փոխնախարար Նազարյանը կարևորել է Հայաստանի' ԵՄ հետ հնարավոր բոլոր ոլորտներում համագործակցության շարունակականությունը՝ ուղղված ժողովրդավարության, մարդու իրավունքների և օրենքի գերակայության ամրապնդմանը, արդյունավետ կառավարմանը, դատաիրավական համակարգի կատարելագործմանը, կոռուպցիայի դեմ պայքարին և այլն: Միևնույն ժամանակ ընդգծվել է, որ ներկա իրողությունների համատեքստում կարևոր է քայլեր ձեռնարկել տարբեր ինտեգրացիոն գործընթացների միջև համագործակցության կամուրջ ձևավորելու ուղղությամբ:

Ստոկհոլմ այցի շրջանակներում ՀՀ ԱԳ փոխնախարար Կարեն Նազարյանը առանձին հանդիպում է ունեցել Շվեդիայի ԱԳՆ պետքարտուղար Ֆրանկ Բելֆրագեի հետ, որին մասնակցել են նաև Շվեդիայի ԱԳՆ քաղաքական հարցերով գլխավոր տնօրեն Թուրբյորն Սուլսթրյոմը և Շվեդիայում ՀՀ դեսպան Արտակ Ապիտոնյանը։

Հանդիպման ընթացքում քննարկվել են հայ-շվեդական հարաբերությունների օրակարգային խնդիրները, ինչպես նաև մտքեր են փոխանակվել տարածաշրջանային և միջազգային զարգացումների վերաբերյալ։