Ավստրիան կաջակցի Հայաստանին համագործակցության ուղիներ գտնելու թե′ ՌԴ-ի, թե′ ԵՄ-ի հետ

Հայաստանի և Ավստրիայի արտաքին գործերի նախարարները քննարկել են երկկողմ հարաբերությունների օրակարգը, տարածաշրջանային, միջազային հարցերի շուրջ կարծիքներ հնչեցրել: Քննարկումները կշարունակվեն նաև աշխատանքային ճաշի ընթացքում, իսկ մինչ այդ ՀՀ արտաքին գործերի նախարարությունում կայացած համատեղ ասուլիսի ժամանակ ՀՀ ԱԳ նախարար Էդվարդ Նալբանդյանը կարևորեց այն հանգամանքը, որ ավստրիացի դիվանագետը Հայաստան է այց ելել մեծ խմբով, որտեղ մեծ թիվ են կազմում գործարարները: «Նրանք հատկապես էներգետիկ ոլորտով են հետաքրքրված, ինչը խթան կհանդիսանա առևտրատնտեսական ոլորտի զարգացման առումով»,- «Արմենպրես»-ի փոխանցմամբ՝ ասաց Նալբանդյանը՝ հավելելով, որ անհրաժեշտ է ընդլայնել պայմանագրերի ցանկը, ակտիվացնել միջխորհրդարանական համագործակցությունն ու հարաբերությունները: 

«Իմ այցը Հայաստան՝ երեք հիմնական նպատակ է հետապնդում: Կարծում եմ, որ այստեղ ստեղծվել է հետաքրքիր քաղաքական իրավիճակ, որը Եվամիությունից պահանջում է որոշակի շարժունակություն»,- ասաց Ավստրիայի արտաքին գործերի նախարար Սեբաստիան Կուրցը՝ հույս հայտնելով, որ կգտնեն հնարավորություն օժանդակելու Հայաստանին, որ կարողանա իր շատ կարևոր տարածաշրջանային գործընկեր Ռուսաստանի հետ աշխատելուն զուգահեռ ընդլայնել համագործակցությունը Եվրամիության հետ:

Կուրցի գնահատմամբ, իր այցը լավ հնարավորություն է՝ զարգացնելու երկու երկրների միջև տնտեսական հարաբերությունները: «Մտադիր ենք Ավստրիայի զարգացման գործակալության գրասենյակ բացել Հայաստանում, որպեսզի ընդլայնենք մեր տնտեսական հարաբերությունները: Մեզ համար դա լավ հնարավարություն է խթանել երկու երկրների միջև համագործակցությունը»,- ասաց Ավստրիայի արտաքին գործերի նախարարը:

ԱԳ նախարար Էդվարդ Նալբանդյանի հրավերով սեպտեմբերի 8-9-ը պաշտոնական այցով Հայաստանում է Ավստրիայի Հանրապետության Եվրոպայի, ինտեգրացիայի և արտաքին գործերի նախարար Սեբաստիան Կուրցը: Այսօր Ավստրիայի Հանրապետության արտգործնախարարն այցելել է Ծիծեռնակաբերդ և հարգանքի տուրք մատուցել Հայոց ցեղասպանության զոհերի հիշատակին: Այցի շրջանակներում Ավստրիայի արտգործնախարարը ներկա կգտնվի նաև Հայաստանում Ավստրիական զարգացման գործակալության գրասենյակի բացման արարողությանը: