«Հրապարակ». «Սերժ Սարգսյանը չարաչար սխալվում է»

Որ կողմ նայում ես, ում հետ խոսում ես, համատարած հուսահատություն է: Մարդիկ ոչ մի լուսավոր բան չեն տեսնում, ոչ մի հույս չունեն, որ երբեւէ ինչ-որ բան կարող է փոխվել մեր երկրում: Եվ այս հուսահատությունը գլխավոր չարիքն է, մեր բոլորի գլխավոր թշնամին, մեր տունը քանդողը, մեր խնդիրները բազմապատկողը: Գրում է «Հրապարակ»-ը:

Եթե Սերժ Սարգսյանին թվում է, թե Սահմանադրություն փոխելով ինչ-որ բան կփոխվի երկրում, նա չարաչար սխալվում է: Չի փոխվելու, անգամ եթե բոլոր հանրապետականներին հավաքի մի դահլիճում եւ կարգադրի լավատես լինել ու զինվորի պես հավատալ վաղվա մեր օրվան: Եվ բանն այն չէ, որ «թշնամի» ուժերը՝ ընդդիմադիրների նոսրացող շարքերն ու հատուկենտ, մի կերպ դիմակայող լրատվամիջոցները խանգարում են այդ լավատեսությանը եւ հոռետեսություն տարածում: Լավատեսության մի փոքրիկ շող կծագի միայն այն ժամանակ, երբ հասարակությունը տեսնի, որ պաշտոնները մեզանում ոչ թե աճուրդի են դրվում, այլ բաժին են հասնում ամենաարժանավորներին: Հույս կարթնանա այն ժամանակ, երբ պարզվի, որ պաշտոն զբաղեցնողները ոչ թե ուտել-խմելու, գործուղումներ գնալու, թանկ մեքենաներ վարելու, գռփել-թալանելու հոգսով են տարված, այլ ջանք չեն խնայում իրենց աշխատանքը լավ կատարելու համար:

Վերջապես, ապագայի հանդեպ հավատ կծնվի այն ժամանակ, երբ իշխանությունը կմոբիլիզացնի իր եղած ու չեղած ռեսուրսը եւ կփորձի ոչ ստանդարտ լուծումների միջոցով երկիրը հանել այս փոսից: Իսկ այդ խնդրի լուծման համար մարդիկ պետք է գոնե մի քանի տարով մոռանան իրենց գրպանների, իրենց ժառանգների, իրենց ազգուտակի մասին: Ուսումնասիրեն համաշխարհային փորձը, խորհրդակցեն ու դրսից հրավիրեն մասնագետների: Դիմեն Սփյուռքին ու մի կողմ դնեն իրենց ամբիցիաները: Վերջապես՝ աշխատեն գիշեր-ցերեկ:

Շարունակությունը` «Հրապարակ»-ի այսօրվա համարում: