Ճապոնիայի նախկին կայսեր կյանքը տեղավորվել է 12 հազար էջում

Ճապոնացի գիտնականների 24-ամյա աշխատանքը պտուղը՝ երկրի նախկին կայսեր Սյովի (կենդանության օրոք՝ Հիրոհիտո) ամբողջական կենսագրությունը, 12 հազար էջի վրա հրապարակվել է Ճապոնիայում: Այդ մասին, ինչպես տեղեկացնում է «Արմենպրես»-ը, սեպտեմբերի 9-ին հայտնել է Կայսերական արքունիքի վարչությունը:

Սյով կայսրի կառավարումն ամենաերկարն է (1901-1989 թթ.) եղել Ճապոնիայի ողջ պատմության ընթացքում, և նրան վիճակվել են այնպիսի դրամատիկական իրադարձություններ, ինչպիսիք են՝ Երկրորդ համաշխարհային պատերազմը, Հիրոսիմայի և Նագասակիի ատոմային ռմբակոծումները, Ճապոնիայի կապիտուլյացիան և ամերիկյան օկուպացիան, Տոկիոյի Օլիմպիական խաղերը (1964), երկրի վերականգնումն ու Ճապոնիայի վերածումը աշխարհի երկրորդ տնտեսության: Նրա կենսագրությունը գրեթե 1,5 անգամ ավելի երկար է ստացվել, քան մինչ այժմ ամենածավալուն աշխատությունը կայսր Մեյձիի (Մուցուհիտո, 1867-1912 թթ.) կյանքի մասին, որի օրոք Ճապոնիան բարեփոխումներ իրականացրեց և սկսեց ակտիվորեն օգտագործել Եվրոպայի ձեռքբերումները:

Սյովի կենսագրությունը հիմնված է 3 հազար պատմական փաստաթղթերի վրա, որոնցից 40-ը հրապարակվել են առաջին անգամ: Դրանք կայսեր օրագրային գրառումներն են ու դպրոցական շարադրությունները, հուշագրություններն ու նրա շրջապատի մարդկանց գրությունները և այլ փաստաթղթեր: Դրա շնորհիվ 20-րդ դարի Ճապոնիայի պատմության շատ փաստեր նոր լուսաբանում են ստանում, իսկ կայսեր անհատականությունը՝ ավելի վաղ անհայտ գծեր: Օրինակ, պարզվել է, որ 12-ամյա գահաժառանգը երազել է ոչ թե գահի, այլ գիտնականի կարիերայի մասին և ցանկացել է դառնալ բնական գիտությունների դոկտոր:

Նրա կենսագրության վրա աշխատանքն սկսվել է կայսեր մահից հետո անմիջապես (1990 թվականի մայիս), իսկ 2014 թվականի օգոստոսին աշխատությունը ներկայացվել է կայսերական ընտանիքին: Սեպտեմբերի 9-ից մինչև նոյեմբերի վերջը այն դիտելու համար բաց է Արքունիքի վարչության արխիվային և տպագիր նյութերի շենքում: Այնուհետև կենսագրությունը կտրվի տպագրության. դրա ամբողջական հրապարակումը կտևի հինգ տարի, հաղորդել է ՌԻԱ Նովոստին: