Ժողովրդավարության միջազգային օրվան նվիրված կարգախոսների մրցույթին մնացել է 2 օր (լուսանկար)

Վերջերս ՀՀ արդարադատության նախարարության ֆեյսբուքյան էջում մի հետաքրքիր հայտարարության հանդիպեցինք: ՀՀ արդարադատության նախարարությունը ՄԱԿ-ի մանկական հիմնադրամի հետ համատեղ Ժողովրդավարության միջազգային օրվան ընդառաջ կազմակերպել է ժողովրդավարությանն առնչվող լուսանկարների և կարգախոսների մրցույթ: Մրցույթին մասնակցել ցանկացողների և այլ մանրամասների մասին զրուցեցինք արդարադատության նախարարի մամուլի խոսնակ Ծովինար Խաչատրյանի հետ:

«Արդեն ստացել ենք բավական հետաքրքիր կարգախոսներ: Լուսանկարները ավելի քիչ են, հիմնականում կարգախոսներ ենք ստանում»,- նշեց Ծ. Խաչատրյանը: Նա հավելեց, որ մասնակցողները տարբեր տարիքի մարդիկ են՝ 18-ից մինչև 60-ն անց: Մրցույթն աշխուժություն է առաջացրել նաև նախարարության աշխատակիցների շրջանում, ովքեր նույնպես խոստացել են մինչև մրցույթի վերջնաժամկետն անպայման մասնակցել: Ուշագրավ է, որ օրերս Արթիկ ՔԿՀ՝ նախարար Հովհաննես Մանուկյանի շրջայցի ընթացքում դատապարտյալներից մեկն անձամբ նախարարին է հանձնել իր կարգախոսը և նշել, որ իրենց քրեակատարողականից կան էլի մարդիկ, ովքեր նույնպես մասնակցելու են մրցույթին:

Հիշեցնենք, մրցույթին մասնակցել ցանկացողները լուսանկարներն ու կարգախոսները կարող են ուղարկել մինչև սեպտեմբերի 12-ը [email protected] հասցեին:

Նշենք, որ Ժողովրդավարության միջազգային օրը նշվում է ամեն տարի սեպտեմբերի 15-ին՝ 2008 թվականից սկսած, որի նպատակն է աշխարհում ժողովրդավարության խրախուսումը: Օրվա համար ամեն տարի ընտրվում է կարգախոս: Այս տարվա կարգախոսն է՝ ներառել երիտասարդներին ժողովրդավարության մեջ: