Հայոց ցեղասպանության ժխտողականության դեմ պայքարը նոր թափ է ստանում. Շարմազանով

Հունաստանի խորհրդարանի կողմից Հայոց ցեղասպանության ժխտումը քրեականացնող օրինագծի ընդունումը ոչ միայն Հայոց ցեղասպանության դատապարտման ուղղությամբ իրականացված քայլ է, այլ ժխտողականության դեմ պայքար: Այս մասին Ազգային ժողովում լրագրողների հետ զրույցում ասաց ՀՀ ԱԺ փոխնախագահ Էդուարդ Շարմազանովը: «Ես զրուցել եմ հույն պատգամավորների հետ, շնորհակալություն եմ հայտնել բոլոր 54 պատգամավորներին, ովքեր կողմ են քվեարկել Հայոց ցեղասպանության ժխտումը դատապարտող օրինագծին և վստահեցրել եմ, որ սա ոչ միայն Հայոց ցեղասպանության դատապարտմանն ուղղված քայլ է, այլ ժխտողականության դեմ պայքար, և այս օրինագիծը դուռ է փակում նոր ցեղասպանությունների առաջ»,- «Արմենպրես»-ի հաղորդմամբ՝ ասաց նա:

Էդուարդ Շարմազանովը նշեց, որ ինքը զրուցել է Հայաստան-Հունաստան խորհրդարանական բարեկամության խմբի ղեկավար, Հունաստանի խորհրդարանի պատգամավոր Ապոստոլոս Կագլամանիսի հետ, ով օրինագծին կողմ քվեարկած բոլոր 54 պատգամավորների անունից վստահեցրել է, որ իրենք պայքարելու են ժողովրդավարության զարգացման համար, իրենք պայքարելու են ցեղասպանության ճանաչման համար և շեշտել է, որ պայքարն առջևում է:

Հարցին, թե Հունաստանում Հայոց ցեղասպանության ժխտումը դատապարտող օրինագծի ընդունումն այս հարցում կարո՞ղ է շտապեցնել ֆրանսիացի խորհրդականներին, Շարմազանովը պատասխանեց, որ ինքը հանդիպել է նաև ֆրանսիացի խորհրդականների հետ: «Նրանք այստեղ էին օրեր առաջ: Ես հանդիպել եմ Ֆրանսիայի խորհրդարանում մեծամասնություն կազմող խմբակցության ղեկավարի հետ, և նրանք մեզ վստահեցրել են, որ իրենք կողմնակից են, որպեսզի Ֆրանսիայի խորհրդարանն ընդունի Հայոց ցեղասպանության ժխտումը քրեականացնող օրինագիծ, և այդ հարցում նրանց ոչինչ չի կարող խանգարել: Նրանք մեզ վստահեցրել են, որ որքան էլ թուրքական կողմից ճնշումներ լինեն, իրենք այդ քայլին գնալու են, և դա իրենց քաղաքական կամքն է»,- ասաց Շարմազանովը՝ ընդգծելով, որ Հայոց ցեղասպանության ժխտողականության դեմ պայքարը նոր թափ է ստանում:

Շարմազանովն ընդգծեց, որ միջազգային առաջադեմ մարդկությունը հասկացել է մի բան, որ քանի դեռ օրենքով չի պատժվել այն, ինչն անժխտելի է, վտանգ կա, որ նոր ցեղասպանություններ կկրկնվեն: «Եվ կարծում եմ, որ նման օրինագծերի ընդունմամբ մենք փակում ենք պատուհանը և դուռը բոլոր ճնշումների վրա: Ի վերջո, Հունաստանի խորհրդարանի կողմից նման որոշումը կարևոր էր նաև այն համատեքստում, որ Նյուպորտում Թուրքիայի նորընտիր նախագահ Էրդողանը հանդիպել էր Հունաստանի վարչապետ Սամարասի հետ և իր դժգոհությունն էր հայտնել այդ օրենքի նախագծի վերաբերյալ, սակայն մենք տեսանք, որ Թուրքիայի նախագահի կողմից գործադրվող ճնշումն այս դեպքում նշանակություն չունեցավ»,- ասաց Շարմազանովը: