Վրաստանի ՆԳ նախարարը Սահակաշվիլիին մեղադրել է երկրում քաոս հրահրելու մեջ

Վրաստանի ներքին գործերի նախարար Ալեքսանդր Չիկաիձեն պնդում է, որ հանրապետության նախկին նախագահ Միխեիլ Սահակաշվիլին իր «Միասնական ազգային շարժում» կուսակցության անդամներին և մի քանի ոչ կառավարական կազմակերպությունների ղեկավարների առաջադրանք է տվել քաոս հրահրել երկրում, տեղեկացնում է «Արմենպրես»-ը՝ հղում անելով «Նովոստի Գրուզիա»-ին:

«Նրանք պետք է գործեն սադրիչ մեթոդներով, ջանան հրահրել ոստիկանությանը, ստեղծեն ֆորսմաժորային իրավիճակներ, կազմակերպեն բողոքի ագրեսիվ ակցիաներ՝ շահարկելով տարբեր թեմաներ, ներառյալ քրեածին իրադրությունը, սոցիալական ու տնտեսական հարցերը, Ռուսաստանի հետ հարաբերությունները, օգտագործեն գաղթականների հիմնախնդիրները, գործադուլներ հրահրեն ռազմավարական առումով կարևոր օբյեկտներում, ստեղծեն քաոս»,-հայտարարել է Չիկաիձեն «Ալիա» թերթին տված հարցազրույցում:

Բացի այդ, ինչպես նշել է ՆԳ նախարարը, Վրաստանի նախկին նախագահը մտադիր է իր ծրագրին մասնակից դարձնել ազգային փոքրամասնություններին: «Նաև, Սահակաշվիլիի հանձնարարությամբ, քաոս հրահրելու պլանին պետք է միանան ազգային փոքրամասնությունները, Վրաստանում պետք է ստեղծվեն շարժունակ խմբեր՝ համալրված ազգային փոքրամասնությունների ներկայացուցիչներով»,-ասել է Չիկաիձեն:

Մինչդեռ, նրա խոսքով՝ «այդ պլանը չի կարող իրագործվել»: «Բոլորը պետք է գիտենան, որ նրանք, ովքեր կգնան հակասահմանադրական ճանապարհով և վտանգ կստեղծեն երկրի համար, խստիվ կպատժվեն օրենքով»,-ընդգծել է Վրաստանի ՆԳ նախարարը: