ԱԺ փոխնախագահն արձագանքել է ԲՀԿ առաջնորդի հայտարարությանը

Աշխարհում չկա որևէ քաղաքական ուժ և քաղաքական գործիչ, ով կհայտարարի, որ քաղաքականություն է մտնում անձնական բարեկեցություն ապահովելու նպատակով: Այս մասին ՀՀԿ գործադիր մարմնի նիստի ավարտից հետո լրագրողների հետ զրույցում նշեց ՀՀԿ խոսնակ, ԱԺ փոխնախագահ Էդուարդ Շարմազանովն՝ անդրադառնալով ԲՀԿ առաջնորդ Գագիկ Ծառուկյանի այն հայտարարությանը, որ չի կարելի քաղաքականություն մտնել անձնական շահեր հետապնդելու համար:

«Ես նման քաղաքական ուժ և գործիչ չեմ ճանաչում, որը կհայտարարի, որ քաղաքականություն է մտել անձնական բարեկեցության բարելավման համար»,- «Արմենպրես»-ի հաղորդմամբ՝ ընդգծեց Շարմազանովը:

Հարցին' համաձա՞յն է, թե փորձը ցույց է տալիս, որ լրիվ հակառակն է տեղի ունենում, Շարմազանովը նկատեց, որ տեսականորեն շատ բան է հնարավոր, սակայն ինքն այստեղ տեսականորեն քաղաքական վերլուծություններ իրականացնելու համար չի եկել:

Հարցին' կա՞ն հանրապետականներ, ովքեր չեն հայտարարել, որ գալիս են քաղաքականություն անձնական խնդիրներ լուծելու համար, սակայն հետո անում են հակառակը, ԱԺ փոխնախագահն այսպես պատասխանեց. «Եթե հարցն ավելի կոնկրետ տաք' կոնկրետ կպատասխանեմ: Սակայն կարող եմ ասել, որ ՀՀԿ-ն իր գործունեության ընթացքում, թերություններով հանդերձ, շատ ավելի դրական քայլեր է ձեռնարկել, և այդ դրական քայլերի արդյունքում է, որ ՀՀԿ-ն եղել, մնում է և, հուսով եմ, դեռ կմնա Հայաստանի ամենաազդեցիկ քաղաքական ուժը: Եվ դա ոչ թե եղել է ՀՀԿ-ի ցանկությամբ, այլ ընտրությունների արդյո ւնքում, որքան էլ դա դուր չգա որոշ քաղաքական գործիչների»,- նշեց Շարմազանովը:

Միևնույն ժամանակ, նրա խոսքով, ՀՀԿ-ն անթերի չէ, և, ընդհանրապես, աշխարհում անթերի քաղաքական ուժ չկա: Ըստ Շարմազանովի՝ եթե կա քաղաքական ուժ, որն իրեն անթերի է համարում, ապա այն իրենից ոչինչ չի ներկայացնում: