Իրենք ԱԺ-ն դիտարկում են որպես ռազմաճակատ. Լևոն Զուրաբյան

Ազգային ժողովի այս քառօրյան հետաքրքիր և լուրջ արդյունքներ արձանագրեց. այն մեծ նշանակություն ունեցավ աշնանային զարգացումներից առաջ: Այս մասին այսօր՝ Ազգային ժողովում լրագրողների հետ հանդիպման ժամանակ, ասաց ՀԱԿ խմբակցության ղեկավար Լևոն Զուրաբյանը:

Վերջինիս խոսքով՝ իշխանությունները հասկացել են, որ ԱԺ-ում բանավեճի ազդեցությունը հասարակության վրա շատ մեծ է:

«Իշխանությունները սեպտեմբերի 30-ի վերջնաժամկետի ավարտից և հանրահավաքից առաջ նպատակ էին դրել մի քիչ շտկել, բարելավել վիճակը, ինչպես իրենք են ասում՝ «Ազգային ժողովը՝ խրամատներում»: Պարզվում է, որ իրենք ԱԺ-ն դիտարկում են որպես ռազմաճակատ»,- ասաց Զուրաբյանը և հավելեց. «Իրենք շատ լուրջ նպատակներ էին դրել իրենց առաջ, որոնցից մեկն այն էր, որ պետք է այս քառօրյայի ընթացքում ներկայացվեին բացառապես բարի բովանդակությամբ նախագծեր, վարկային ծրագրեր: Նպատակներից էր նաև քառյակի պառակտմանը հասնելը՝ ամեն տեսակի ճնշմամբ»,- նշեց նա:

Լևոն Զուրաբյանի խոսքով՝ այս քառօրյայի մարտից առաջ իրենք ևս ունեին իրենց նպատակները. «Մեզ համար շատ կարևոր էր՝ մեր ժողովրդին ցույց տալ այս իշխանության սնանկությունը՝ հոգևոր իմաստով, որովհետև իրենց անձնական հարստության առումով կարող ենք հակառակն ապացուցել: Սնանկություն կառավարման առումով՝ մենք պատահական չէր, որ բարձրացրինք մի թեմա՝ արտագաղթը և քառյակը պահանջեց լսումներ այս թեմայով և ի՞նչ ստացաք, ոչ մի պատասխան»,- ասաց Զուրաբյանը: