Միակողմանի զիջումները Հայաստանի համար ընդունելի չեն. Սեյրան Օհանյան

Ադրբեջանը փորձում է սահմանին սադրանքներն օգտագործել Ղարաբաղյան հակամարտության կարգավորման բանակցային գործընթացի վրա ազդելու համար: Սակայն հայկական զինված ուժերն իրենց մարտունակությամբ կարողանում են Հայաստանի և Արցախի սահմաններն անառիկ պահել և դժվարագույն պայմաններում պահպանել խաղաղությունը:

ՀՀ պաշտպանության նախարար Սեյրան Օհանյանի գնահատմամբ, Լեռնային Ղարաբաղի հակամարտության կարգավորման հարցում Հայաստանի դիրքորոշումը մեկն է, և այն երբեք չի փոխվել' մեր երկիրը հանդես է գալիս հակամարտությունը խաղաղ ճանապարհով լուծելու դիրքերից: Ըստ նախարարի, Արցախի ժողովրդի ինքնորոշմանը չկա այլընտրանք, և այս հարցում հայ ժողովուրդը պետք է դրսևորի միասնական կամք վերջնական արդյունքի հասնելու համար:

«Խոսքը զուտ նախնիների հողում Լեռնային Ղարաբաղի ժողովրդի ինքնորոշման իրավունքի մասին է: Դրան այլընտրանք չկա, և մենք պետք է ամեն ինչ անենք դրա համար: 1992-1994թթ. նրանք քանակով և սպառազինությամբ մեզանից շատ էին, սակայն հաղթանակը մերն էր, այժմ էլ են նրանք քանակով ու սպառազինությամբ շատ, բայց պատերազմում միայն այդ երկու չափանիշով չեն հաղթում և մնացյալ չափանիշները փաստում են, որ պատերազմի դեպքում հաղթող կողմը կրկին մենք ենք լինելու: Առաջին անգամ մեզ պարտադրված պատերազմում մենք պաշտպանեցինք մեր սահմանները: Բայց հակառակորդը փորձում է երկրորդ անգամ ճնշում գործադրել և հասնել զիջումների: Մեզ համար ընդունելի են փոխադարձ պայմանավորվածությունները, բայց անընդունելի են անհասկանալի զիջումները՝ անհայտության դիմաց»,- «Արմենպրես»-ի փոխանցմամբ' Հայաստանի պետական տնտեսագիտական համալսարանում կայացած հանդիպման ժամանակ ասաց Օհանյանը' հավելելով, որ հակառակորդը ռազմաշունչ հռետորաբանությամբ և սահմանին խախտումների միջոցով ուժ է ցուցադրում' փորձելով այդ կերպ ազդել բանակցային գործընթացի վրա:

Ըստ նախարարի՝ հուլիս-օգոստոսին սահմանին հրադադարի դեպքերի ավելացումն ու լարվածության աննախադեպ բարձր մակարդակը հենց դրան էին միտված: «Դա չստացվեց' հայ սպաների և զինվորների խիզախության շնորհիվ: Դիվերսանտները ոչ միայն հետ շպրտվեցին, այլև կանխարգելիչ միջոցառումներ ձեռնարկվեցին: Այդ լարվածության արդյունքում հակառակորդն 9 անգամ ավելի շատ կորուստ տվեց: Ես ցավում եմ, թե' մեր, թե' հակառակորդի զոհերի համար և միաժամանակ հայտարարում, որ հակառակորդի զոհերը իրենց երկրի ռազմաքաղաքական ղեկավարության խղճին են»,- ասաց նախարարը: