«Հրապարակ». Հակադրել սահմանադրական այնպիսի բարեփոխումներ, որոնցից նույնիսկ Սերժ Սարգսյանը զարմանա

Սերժ Սարգսյանը փորձելու է դառնալ ընդմիշտ, ինչպես Կոկա-կոլան: Քաղաքական տերմինով դրան ասում են` կրկին փորձելու է վերարտադրվել: Գրում է «Հրապարակ»-ը:

ԲՀԿ (ՀԱԿ)-ը դեմ է սահմանադրական բարեփոխումներին եւ սպառնում է ապագա հանրաքվեն վերածել նախագահի պաշտոնանկության հանրաքվեի, որպեսզի նախագահը չվերարտադրվի: Լավ էր, Գագիկ Ծառուկյանն իր հարցազրույցում մի փոքր շտկեց հարցի այս տապոռային դրվածքը եւ հայտարարեց' մենք կողմ ենք դեպի լավը փոփոխության, բայց ոչ վերարտադրմանը: Սա, անշուշտ, լուրջ առաջընթաց է, որ պետք է արձանագրել, մանավանդ, որ Ծառուկյանն էլ դեմ չէ, կարծես, սահմանադրական բարեփոխումների հետ կապված լայն եւ մասնագիտական առումով ներկայացուցչական քննարկումներ անցկացնելու գաղափարին:

Երբ սառույցը, կարծես, կոտրվել է, ակամա հարց է առաջանում' ի՞նչ նոր մարտավարություն ընտրել, որպեսզի իշխանությունը չկարողանա այնպես փոփոխել Սահմանադրությունը, որ այն ծառայի իր վերարտադրությանը: Ավելին' հնարավոր չէ՞, արդյոք, այնպիսի բարեփոխումներ կատարել, որոնք նույնիսկ վերարտադրվելու շանս չտան իշխանություններին: Կարծում ենք' խելք գործադրելու պահն է, եւ հապաղելը հավասարազոր կլինի պայքարից հրաժարվելուն:

Միջանկյալ կարգով նաեւ «Ժառանգությանն» ասենք, որ սահմանադրական բարեփոխումներին դեմ լինել միայն այն բանի համար, որ դրանք առաջարկվում են ոչ լեգիտիմ իշխանությունների կողմից` հնացած հնարք է: Իշխանություններին ոչ լեգիտիմ համարելու համար բավականին ծանրակշիռ փաստարկներ են պետք, որոնք «Ժառանգությունը», բնականաբար, չունի: Որտեղի՞ց ունենա, երբ այդ նույն ոչ լեգիտիմ իշխանությունների կարկառուն ներկայացուցիչ Տարոն Մարգարյանի մոտ ավագանի են աշխատում: Իսկ գուցե իշխանությունների ոչ լեգիտիմությունից խոսող Արմեն Մարտիրոսյանը Տարոն Մարգարյանին, այնուամենայնիվ, լեգիտիմ քաղաքապե՞տ է համարում: Լեւոն Տեր-Պետրոսյանը կենդանի վկա է, հարգելի ժառանգականներ, հարցրեք նրան, եւ նա կբացատրի, թե ինչու ժամանակին քաղաքապետարան անցած ՀԱԿ-ը չգնաց այնտեղ աշխատելու, ինչու 2012 թվականին մասնակցեց ոչ լեգիտիմ իշխանությունների կազմակերպած ԱԺ ընտրություններին, ինչու, 7 տեղ ստանալով ԱԺ-ում, հանդարտվեց, եւ ինչպես է, որ հիմա ՀԱԿ պատգամավորները հաճույքով հարցեր են հնչեցնում ոչ լեգիտիմ ԱԺ-ում ու բանավիճում ԱԺ ոչ լեգիտիմ նախագահ Գալուստ Սահակյանի հետ: Ես կասեի' արդեն մոռացել էին Սերժ Սարգսյանի հրաժարականի մասին եւ չէին էլ հիշի, եթե Սերժ Սարգսյանը չառաջարկեր այս սահմանադրական փոփոխությունները:

Ի՞նչ անել ստեղծված իրավիճակում: Առաջին հերթին լրջանալ եւ թույլ չտալ, որ այս կարեւոր միջոցառումը գործից վերածվի ավելորդ աղմուկի եւ ոչ մի կերպ չնպաստի քաղաքական դաշտի եւ հասարակության գոնե փոքր-ինչ առողջացմանը: Իսկ որպեսզի նման բան տեղի չունենա, պետք է իշխանության վերարտադրությանը նպաստող «բարեփոխումներին» (եթե այդպիսիք լինեն առաջարկվող տարբերակում) հակադրել սահմանադրական այնպիսի բարեփոխումներ, որոնցից նույնիսկ Սերժ Սարգսյանը զարմանա: Ուզում ես փոխե՞լ Սահմանադրությունը' հարց չկա, փոխենք, բայց այսպես:

Շարունակությունը՝ թերթի այսօրվա համարում: