Իսլամիստները զգուշացրել են Ադրբեջանին

Արտասահմանյան մամուլում բավականաչափ տեղեկություններ են հրապարակվել «Իրաքի և Լևանտի իսլամական պետություն» (ԻԼԻՊ) ահաբեկչական խմբավորման' Ադրբեջանի համար ևս մեծ վտանգ լինելու մասին: Իրաքում և Սիրիայում կառավարական ուժերի դեմ կռվող ահաբեկչական կազմակերպության կազմում ադրբեջանցիների մասնակցությունը խիստ անհանգստացնում է Ադրբեջանի իշխանություններին: Ադրբեջանի համար ԻԼԻՊ-ի ստեղծած վտանգների մասին հայտնում է նաև Եվրոպայի ինստիտուտի աշխատակից Նադանի Ֆրիդրիխսոնը: Նրա հոդվածում ասվում է, որ ԻԼԻՊ-ն այլևս չի թաքցնում Ադրբեջանի հետ կապված իր ծրագրերը, և «Իսլամական պետության» վտանգը սպառնում է նաև այդ երկրին: Այս մասին, ինչպես հաղորդում է «Արմենպրես»-ը, հայտնում է «Ազադլըգ» թերթը:

Այս տարվա հուլիսին ԻԼԻՊ-ի կողմից հրապարակված քարտեզում Ադրբեջանը ներկայացված էր ԻԼԻՊ-ի ստեղծելիք խալիֆայության մեջ: Ըստ քարտեզի' Ադրբեջանը բաժանվելու է երեք մասի: Հյուսիսային Ադրբեջանի մի մասը ներկայացված է ԻԼԻՊ-ի հյուսիսկովկասյան ամիրայության կազմում, միջին մասը' հարավկովկասյան ամերիայության, իսկ հարավային մասն ամբողջությամբ բաժանված է Սպահանի և Քրդստանի ամիրայությունների միջև:

Թեև հետագայում հրապարակված քարտեզից Ադրբեջանի անունը հանվել է, սակայն, ուշադրության հրավիրելով ժամանակ առաջ Բաքվում անցկացված «հիջաբի ակցիային», վերլուծաբանը հայտնում է, որ Ադրբեջանում «մահմեդական ընդդիմություն» է ձևավորվում: «Ադրբեջանում մահմեդական ուժի հիմնական մասը կարող են դառնալ Սիրիայում հակակառավարական մարտերին մասնակցած, այժմ տուն վերադարձող ջիհադական ադրբեջանցիները: Այդ տեսակետից ելնելով' հնարավոր պայթյունավտանգ շրջաններում կարելի է ընդգրկել նաև Ադրբեջանը, ինչպես նաև Իրանի հյուսիսային հատվածը»,- նշել է եվրոպացի փորձագետը:

Նրա խոսքով' արևմտյան վերլուծաբանները գտնում են, որ Ադրբեջանի համար «արմատական կրոնական վտանգը» կարող է բխել Ռուսաստանից և Իրանից: Վերջերս այդ հնարավոր վտանգների մասին բարձրաձայնել էր նաև ԱՄՆ-ի հետախուզության օրինական անդամ ճանաչված «Ստրատֆոր» կենտրոնի տնօրեն Ջորջ Ֆրիդմանը, ով Արևմուտքին կոչ արել մտածել այդ մասին:

«Ազադլըգ»-ի հետ զրույցում «Ազատ դեմոկրատներ» կուսակցության առաջնորդ Սուլհեդդին Աքբերը հայտարարել է, որ առանց միջազգային համագործակցության, Ադրբեջանի միայնակ պայքարը ԻԼԻՊ-ի նման ահաբեկչական կազմակերպության դեմ անիմաստ է: