Գյումրու քաղաքապետարանում կրճատումները կապված են միայն աշխատավարձի հետ

Գյումրու քաղաքապետարանում վերջին ամիսների կրճատումները կապված են միայն ցածր աշխատավարձի հետ: Այս մասին լրագրողների հետ ունեցած ճեպազրույցի ժամանակ նշեց Գյումրու քաղաքապետ Սամվել Բալասանյանը՝ վստահեցնելով, որ կրճատումների համար այլ պատճառներ չկան և, որ ծառայողներն աշխատանքից ազատվում են միայն ու միայն սեփական դիմումների համաձայն:

Օրեր առաջ աշխատանքից ազատման դիմում էր ներկայացրել քաղաքապետարանի աշխատակազմի մշակույթի և երիտասարդության հարցերի բաժնի պետ Արտաշես Կարապետյանը, քաղաքապետի մամուլի խոսնակ Զոհրապ Եգանյանը և իրավաբանական բաժնի պետ Արտակ Ղազարյանը, իսկ մի քանի ամիս առաջ, սեփական դիմումի համաձայն, զբաղեցրած պաշտոնից ազատվել էր փոխքաղաքապետ Գուրգեն Մալխասյանը:

«Իրենք գնում են սեփական ցանկությամբ: Բացի այդ, քաղաքապետարանն այնպիսի լավ դարբնոց է դարձել, որ այստեղից գնում են ավելի բարձր պաշտոնների, ավելի բարձր աշխատավարձով: Իրենք են ուզում, աշխատանքից դուրս են գալիս. քաղաքապետը մեղավոր չէ»,- «Արմենպրես»-ի հաղորդմամբ' նշեց Սամվել Բալասանյանը՝ վստահեցնելով, որ դա հիմնականում ցածր աշխատավարձի հետ է կապված: «Մարդը 70 հազար դրամով չի կարող իր տունը պահել, բայց մենք չենք կարող աշխատավարձը բարձրացնել: Եթե հիշում եք, ստիպված էինք նաև քաղաքապետարանի 2 բա ժիններ միացնել իրար: Կան խնդիրներ: Բայց, միևնույն ժամանակ, քաղաքապետարանը հենց ազատված պաշտոնների համար հայտարարում է մրցույթներ, որոնք բաց են բոլորի համար: Հրավիրում ենք երիտասարդ մասնագետների. թող գան, մասնակցեն այդ մրցույթներին: Մեր քաղաքում չկա ու չի լինելու կոռուպցիա: Ինձ միայն լավ մասնագետներ են պետք»,-ավելացրեց Գյումրու քաղքաքապետը: