«Հրապարակ». Ծառայության մեկնելիս արտոնյալներ չկան և չեն լինելու. Սեյրան Օհանյան

Պաշտպանության նախարար Սեյրան Օհանյանը շրջում է ՀՀ պետական բուհերով՝ բանակ-հասարակություն կապն ամրապնդելու, բանակի ու զինծառայության արժեքը քարոզելու, հայրենասիրական դաստիարակություն իրականացնելու նպատակով:

Միջոցառման ավարտին «Հրապարակ»-ը Սեյրան Օհանյանին մի քանի հարց է ուղղել:

- Պարոն Օհանյան, ի՞նչ նպատակով եք այցելում բուհեր:

- Բանակ-հասարակություն կապի ամրապնդման համար: Մեր հասարակությանը ներկայացնելու այն իրողությունները, զարգացման ընթացքը, որ այսօր կա բանակում, որպեսզի մեր հասարակությունը վստահ լինի, որ բանակը մարտունակ է եւ պատրաստ է երկրի պաշտպանությունն իրականացնելու համար: Բացի դրանից, ամենակարեւոր խնդիրը հայրենասիրական դաստիարակություն, մատաղ սերնդի ռազմահայրենասիրական դաստիարակություն իրականացնելու համար է:

- Կարծում եք այս այցերով հնարավո՞ր է դա ապահովել:

- Միայն այդ այցերով չեն միջոցառումները սահմանափակվում, համապատասխան գործողությունների պլան մենք ունենք կրթության եւ գիտության նախարարության հետ մեկտեղ, բոլոր դպրոցները կցված են հանրապետության բոլոր զորամասերին, կենտրոնական ապարատի բոլոր ղեկավար կազմը կցված են բուհերից, եւ այս այցելությունների ժամանակ քննարկվում են հարցեր եւ որոշումներ ընդունվում:

- Այս դահլիճում ներկա ուսանողներից շատերը խուսափել են ծառայությունից՝ գիտությամբ զբաղվելու պատրվակով: Դա Ձեզ չի՞ մտահոգում:

- Մենք այսօր որոշում ենք ընդունում, որպեսզի տարկետումները սահմանափակվեն, ու բոլորը գնան բանակ:

- Դուք կարո՞ղ եք վստահ հայտարարել, որ աշնանային զորակոչի ժամանակ որեւէ պաշտոնյայի որդի արտոնյալ պայմաններում չի ծառայի, եւ որեւէ մեկը չի ազատվի ծառայությունից:

- Այսօրվա գոյություն ունեցող օրենքով որեւիցե արտոնյալ չկա եւ չի լինելու ծառայության մեկնելիս:

- Պարոն Օհանյան, շփման գծում օգոստոսյան լարվածության մեջ որոշ քաղաքագետներ մեղադրում էին Ռուսաստանին՝ նշելով, որ Ադրբեջանին ակտիվացնելով, ապա Սերժ Սարգսյան-Ալիեւ հանդիպումը նախաձեռնելով՝ Վլադիմիր Պուտինը նպատակ ունի ընդգծել տարածաշրջանում իր ազդեցությունը: Սոչիում կայացած եռակողմ հանդիպումից հետո շփման գծում իրավիճակը խաղաղվեց: Արդյո՞ք այդպիսով չհաստատվեցին քաղաքագետների մեկնաբանությունները:

- Ես գտնում եմ, որ դա Ադրբեջանի Հանրապետության որդեգրած քաղաքականության արդյունքն է, բանակցային գործընթացի շրջանակներում տարբեր հանդիպումների, միջոցառումների ժամանակ կամ դրանից առաջ եւ հետո լարել իրադրությունը՝ միակողմանի ուժային ազդեցություն ունենալու Հայաստանի Հանրապետության վրա, այն չիրագործվեց, որովհետեւ մենք արժանի հակահարված տվեցինք:

Շարունակությունը՝ թերթի այսօրվա համարում: