Նյու Յորքում բացվել է ՄԱԿ-ի Գլխավոր ասամբլեայի 69-րդ նստաշրջանը

ՄԱԿ-ի Նյու Յորքի կենտրոնակայանում աշխատանքն է սկսել համաշխարհային կազմակերպության Գլխավոր ասամբլեայի 69-րդ նստաշրջանը: Նրա առաջին նիստը բացել է ԳԱ-ի նախագահը՝ ուգանդացի դիվանագետ Սեմ Կուտեսա Կահամբան, գրում է «Արմենպրես»-ը:

Ազդարարելով նոր նստաշրջանի սկսվելը՝ նա «լռության, աղոթքի և խորհրդածելու» րոպե է հայտարարել: ԳԱ-ի նիստին մասնակցում են ՄԱԿ-ի անդամ 193 երկրների պատվիրակները, ինչպես նաև համաշխարհային կազմակերպության գլխավոր քարտուղար Պան Գի Մունը:

Ելույթ ունենալով ԳԱ-ի ամբիոնից՝ ՄԱԿ-ի վարչական ղեկավարը հայտարարել է, որ առաջիկա տարին «պետք է դառնա գործողությունների ժամանակաշրջան, արդյունքների ժամանակաշրջան»: «Մեզ սպասում են լուրջ փորձություններ, ինչպես նաև մեծ ակնկալիքներ խաղաղության, զարգացման և մարդու իրավունքների հարցերում: Մենք դրանցով անմիջականորեն կզբաղվենք արդեն այս ամսին՝ անցկացնելով բարձր մակարդակի հանդիպումներ, որպեսզի խոչընդոտենք կլիմայի փոփոխման իրական սպառնալիքին, պաշտպանենք աշխարհի բնիկ ժողովուրդների իրավունքներն ու հնարավորությունները, համախմբվենք հանուն կանանց ու աղջիկների առողջության բաելավման, դիմակայենք Էբոլա վիրուսի համաճարակին և հակազդենք խաղաղության ու անվտանգության բազմաթիվ մարտահրավերներին»,- ասել է Պան Գի Մունը:

Նոր նստաշրջանի աշխատանքի առավել կարևոր ու հագեցած փուլը կսկսվի արդեն հաջորդ շաբաթ. սեպտեմբերի 23-ին Գլխավոր ասամբլեայի շրջանակներում տեղի կունենա կլիմային նվիրված մեկօրյա գագթնաժողովը, որը հրավիրվում է ՄԱԿ-ի գլխավոր քարտուղարի կողմից: Հաջորդ օրը համաշխարհային կազմակերպության կենտրոնակայանում կբացվեն ամենամյա ընդհանուր քաղաքական բանավեճերը, որոնց կմասնակցեն ՄԱԿ-ի անդամ բոլոր 193 անդամները, ինչպես նաևՊաղեստինը, որը 2012 թվականից դիտորդ պետության կարգավիճակ ունի ՄԱԿ-ում: Հիմնականում պատվիրակությունները ներկայացված կլինեն պետությունների, կառավարությունների և ԱԳ նախարարությունների ղեկավարների մակարդակով:

Առանձնակի ուշադրություն կգրավի նստաշրջանի առաջին և երկրորդ օրվա աշխատանքը: Սեպտեմբերի 24-ին Գլխավոր ասամբլեայի ամբիոնից երկրներին կդիմի ԱՄՆ-ի նախագահ Բարաք Օբաման: Հաջորդ օրը պլանավորված է Ուկրաինայի նախագահ Պյոտր Պորոշենկոյի ելույթը, հաղորդել է ԻՏԱՌ-ՏԱՍՍ-ը: