Էբոլա տենդի համաճարակն անվերահսկելի է դառնում. Օբամա

Արևմտյան Աֆրիկան ճարակած Էբոլա տենդի համաճարակն անվերահսկելի է դառնում: Այս հայտարարությունը սեպտեմբերի 17-ին արել է ԱՄՆ-ի նախագահ Բարաք Օբաման, տեղեկացնում է «Արմենպրես»-ը՝ հղում անելով Reuters գործակալությանը: Նա կոչ է արել համաշխարհային հանրակցությանը՝ ակտիվ գործողություններ ձեռնարկել վտանգավոր հիվանդության տարածումը կանխելու համար:

«Դաժան ճշմարտությունն այն է, որ Արևմտյան Աֆրիկայում մոլեգնում է աննախադեպ մասշտաբների համաճարակը: Այն խորանում է և դուրս է գալիս հսկողությունից, իրադրությունը վատթարանում է»,- նշել է Օբաման Ատլանտայում Հիվանդությունների վերահսկողության և կանխարգելման կենտրոն կատարած իր այցելության ընթացքում: Նրա խոսքով, եթե համաճարակը չկանխվի, ապա այն կարող է վարակել հարյուր հազարավոր մարդկանց:

«Վիրուսի տարածումը կարող է լուրջ հետևանքների հանգեցնել տնտեսության, քաղաքականության և անվտանգության ոլորտներում»,- նախագահի խոսքը մեջբերել է Associated Press-ը:

Այդ կապակցությամբ, Օբամայի խոսքով, Վաշինգտոնն «էականորեն ավելացնում է պատասխան միջոցների կիրառման ինտենսիվությունը»: Այսպես, ԱՄՆ-ը, Լիբերիայի իշխանությունների խնդրանքով այդ երկրում զինվորական հրամանատարական կենտրոն կստեղծի Էբոլա տենդի տարածման դեմ պայքարում Արևմտյան Աֆրիկայի երկրների իշխանություններին օգնություն ցուցաբերելու ջանքերը համակարգելու համար: Այն կգլխավորի Աֆրիկայում ԱՄՆ-ի ցամաքային զորքերի հրամանատար Դերիլ Ուիլյամսը:

Սեպտեմբերի 16-ին հայտնի է դարձել, որ Օբաման որոշել է երեք հազար զինվորների ուղարկել Արևմտյան Աֆրիկա Էբոլա վիրուսի դեմ պայքարելու համար: