ՀՅԴ-ն կներկայացնի առաջարկների փաթեթ սահմանադրական բարեփոխումների վերաբերյալ

ՀՅԴ-ն պատրաստվում է մասնակցել սահմանադրական բարեփոխումների վերաբերյալ բովանդակային քննարկումներին և ներկայացնել իր առաջարկները: Այս մասին Ազգային ժողովում լրագրողների հետ զրույցում հայտարարեց ԱԺ ՀՅԴ խմբակցության ղեկավար Արմեն Ռուստամյանը: «Մենք մասնակցելու ենք բովանդակային քննարկումներին և ներկայացնելու ենք բարեփոխումների մեծ փաթեթը, ներկայացնելու ենք այն անհրաժեշտ փոփոխությունները, որոնք մենք ցանկանում ենք տեսնել սահմանադրական բարեփոխումների արդյունքում»,- «Արմենպրես»-ի հաղորդմամբ՝ ասաց Ռուստամյանը:

ՀՅԴ խմբակցության ղեկավարը նշեց, որ ինքն այս պահին համաձայն չէ հնչող տեսակետների հետ, թե իշխանությունները սահմանադրական բարեփոխումները նախաձեռնել են կրկին վերարտադրվելու հնարավորություն ունենալու համար: «Եթե մեր առաջարկած փաթեթն ընդունվի, ապա բացառվում է, որ իշխանությունները վերարտադրվելու հնարավորություն ստանան: Եթե ընդունվեն մեր առաջարկները, մենք հնարավորություն կստանանք երկիրը տանել զարգացման ճանապարհով, մենք նոր Հայաստան կունենանք»,- նշեց Ռուստամյանը:

Պատգամավորը միևնույն ժամանակ ընդգծեց, որ եթե իշխանությունները սահմանադրական բարեփոխումների վերաբերյալ իրենց առաջարկները չընդունեն, այդ դեպքում իրենք ևս կհայտարարեն, որ սահմանադրական բարեփոխումներով իշխանությունները վերարտադրվել են ցանկանում:

Ռուստամյանը նկատեց, որ ցանկացած իշխանություն ինչ-որ ժամանակ փոխզիջումների է գնում, երբ զգում է, որ կարող է կորցնել ամեն ինչ: Պատգամավորը չի բացառում, որ իշխանությունները, սահմանադրական բարեփոխումների դիմելով, զիջումների են գնում, իսկ իրենք կողմնակից են այդ զիջումներին: