Գերմանացի պատգամավորը Ադրբեջանի «սև ցուցակում» է Ստեփանակերտ այցելելու համար

Օրեր առաջ Երևան և Ստեփանակերտ այցելած Քրիստոնեադեմոկրատական կուսակցության պատգամավոր, Բունդեսթագի արտաքին հարաբերությունների հանձնաժողովի անդամ Մանֆրեդ Գրունդն արդեն հայտնվել է Ադրբեջանի «սև ցուցակում»: Այդ մասին պատգամավորին տեղեկացրել են պաշտոնապես: Ի պատասխան, Գերմանիայում Ադրբեջանի դեսպանատան հայտարարության, Մանֆրեդ Գրունդն ասել է, որ ժողովրդի կողմից ընտրված պատգամավոր է և իր կամքն է գնալ այնտեղ ուր ցանկանում է՝ առանց որևէ մեկին տեղյակ պահելու: «Արմենպրես»-ի հետ զրույցում Մանֆրեդ Գրունդն ասաց, որ երեք անգամ եղել է Ադրբեջանում և հույս ունի, որ դիվանագետների' Ղարաբաղ այցելության վերաբերյալ Ադրբեջանի դիրքորոշումը կփոխվի:

«Գերմանիան ԵԱՀԿ Մինսկի խմբի համանախագահ չէ, և մենք Ղարաբաղի հարցի վերաբերյալ այդքան էլ շատ տեղեկատվության չենք տիրապետում: Մենք տեղեկացված ենք Ադրբեջանի և Հայաստանի տեսակետերի մասին այդ հարցի վերաբերյալ: Բայց ինձ համար շատ կարևոր էր տեսնել իրավիճակը Լեռնային Ղարաբաղում և տեղեկանալ հասարակության տեսակետին և վերաբերմունքին: Հենց այդ պատճառով էլ ես այցելեցի Լեռնային Ղարաբաղ և հույս ունեմ, որ բանակցությունների միջոցով հարցի կարգավորումը իրականություն կդառնա և այդ հատվածում կբացառվի ռազմական հակամարտությունը»,- «Արմենպրես»-ի հետ զրույցում ասաց Մանֆրեդ Գրունդը' հավելելով, որ մտավախություն ունի, որ ինչ-որ մեկը Սիրիայում և Ուկրաինայում հակամարտությունները կօգտագործի' խնդրին բացասական լուծում տալու համար: Մանֆրեդ Գրունդի գնահատմամբ' գոյություն ունի հակամարտության կարգավորման մի քանի տարբերակ:

«Ներկա դրությամբ հակամարտության խաղաղ կարգավորման հանգուցալուծում չի նկատվում, քանի որ Ադրբեջանը հսկայական ներդրումներ է կատարում սպառազինություն ձեռք բերելու համար, Հայաստանն էլ Ռուսաստանի բանտարկյալն է դարձել: Սակայն, եթե պատերազմ սկսվի, դա ձեռնտու չէ ոչ ոքին և երկու կողմն էլ կհամարվեն պարտված»,- ասաց Գրունդը' հավելելով, որ պետք է գտնել հակամարտության խաղաղ կարգավորման բանալին:

Լեռնային Ղարաբաղի հակամարտության ռազմական փուլը ծագել է 1991թ., երբ ի պատասխան ԼՂ բնակչության ինքնորոշման պահանջի, ադրբեջանական իշխանությունները փորձեցին հարցը լուծել' խորհրդային անվտանգության ուժերի (ԿԳԲ-ի հատուկ ջոկատներ) կողմից անձնագրային ռեժիմի իրականացման քողի տակ էթնիկ զտումներ իրականացնելով և լայնածավալ ռազմական գործողություններ սկսելու ճանապարհով, որը բերեց հազարավոր զոհերի և զգալի նյութական կորուստների: 1994թ. կնքվեց զինադադար: Հիմնախնդրի կարգավորման շուրջ բանակցությունները ընթանում են ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրանսիա) միջնորդությամբ' 2007 թ. նոյեմբերին ներկայացված մադրիդյան առաջարկությունների հիման վրա:

Ադրբեջանը մինչ այսօր շարունակում է տարածաշրջանում սպառազինությունների մրցավազքի հրահրումը' կոպտորեն խախտելով միջազգային իրավունքի ուժի և ուժի սպառնալիքի չկիրառման սկզբունքը: