Աղվան Վարդանյանը հույս ունի, որ եռյակը սահմանադրական բարեփոխումներից հրաժարում չի պահանջի

ՀՀ Ազգային ժողովի ՀՅԴ խմբակցության քարտուղար Աղվան Վարդանյանը հույս ունի, որ ոչ իշխանական քառյակի մեջ մտնող երեք ուժերը հոկտեմբերի 10-ին նախատեսված հանրահավաքում չեն դնի սահմանադրական բարեփոխումներից հրաժարվելու պահանջը: Այս մասին հայտնեց պատգամավորը լրագրողների հետ հանդիպման ժամանակ: «Որն է լինելու եռյակի պահանջն իշխանություններից հանրահավաքի ժամանակ. ամբողջական իշխանափոխություն, բայց սա ինչ է նշանակում, դժվարանում եմ ասել: Ես վստահ չեմ, որ մեր գործընկեր քաղաքական ուժերը կողմ են փողոցում էսկալացիային, համենայն դեպս ըստ իրենց կատարած հայտարարությունների: Կառավարության հրաժարական, կարծում եմ' չի լինի, այդ փուլը ևս անցել է: Ես կցավեմ ու կափսոսամ, եթե նրանք որոշեն, որ հաղթական պահանջ կարող է լինել սահմանադրական փոփոխություններից հրաժարումը: Մեր կարծիքով' դա մեր երկրի համար կլինի սխալ ընթացք: Չուզենալով երեք ուժերը կնպատսեն իշխանության հետագա դիրքերի ուժեղացմանն ու ամրապնդմանը»,-հայտնեց Աղվան Վարդանյանը:

Խոսելով սահմանադրական բարեփոխումների մասին' ՀՅԴ պատգամավորը վերահաստատեց իր կուսակցության դիրքորոշումը' Հայաստանին պետք է խորհրդարանական համակարգ: «Մեզ համար մի բան ակնհայտ է, որ ներկայիս համակարգը մեր երկրին լավ բանի չի բերել: Անհրաժեշտ է այնպիսի համակարգ ստեղծել, ուր կլինեն հավասարակշռման մեխանիզմներ, ընդդիմությունը կդառնա իշխանության մի մաս, կբացառվի իշխանության վերարտադրման գործընթացը»,-«Արմենպրես»-ի փոխանցմամբ'հայտնեց Աղվան Վարդանյանը' հավելելով, որ վստահ չէ, որ իշխանությունները կողմ կլինեն խորհրդարանական համակարգին: «Դրա համար էլ մենք հանդես կգանք սահմանադրական բարեփոխումների մեր առաջարկություններով: Մենք քառյակի մյուս ուժերին առաջարկեցինք համատեղ մշակել առաջարկությունների այն փաթեթը, որը կստիպեր փոխել ընտրական համակարգը, իշխանությունների վերարտադրվելու ցանկությունը նվազեցնել: Մենք ասում էինք' եկեք միասին քննարկենք ու գտնենք ոսկե միջինը այն առանցքային հարցերի, որոնք պետք է դրվեն իշխանության սեղանին: Այդ պարագայում շատ ավելի ուժեղ կլ իներ մեր բոլորի դիրքորոշումը, ցավոք այդ համաձայնությունը չկարողացանք ունենալ»,-տեղեկացրեց պատգամավորը: Նա նաև հայտնեց, որ քառյակը շարունակելու է համագործակցել բոլոր այն հարցերում, ուր համաձայնություն ունեն:

Սեպտեմբերի 17-ին խորհրդարանական չորս ուժերի նիստից հետո պարզ դարձավ, որ «Բարգավաճ Հայաստան» կուսակցությունը, «Ժառանգությունը» և ՀԱԿ-ը հոկտեմբերի 10-ին հանրահավաք կանցկացնեն: ՀՅԴ-ն չի մասնակցի հանրահավաքին: