Հզորանում է ԱԻՆ համագործակցության անգլիական թևը (լուսանկար)
Հասարակություն
Սեպտեմբերի 19-ին ՀՀ ԱԻ նախարարություն էր այցելել ՀՀ-ում Մեծ Բրիտանիայի և Հյուսիսային Իռլանդիայի միացյալ թագավորության փոխդեսպան Ամիաս Մուռեսը: Հանդիպմանը մասնակցում էր ԱԻ նախարարի տեղակալ Դավիթ Կարապետյանի գլխավորած աշխատանքային խումբը, որի կազմում էին նաև ԱԻՆ փրկարար ծառայության տնօրենի տեղակալ, գեներալ մայոր Նիկոլայ Գրիգորյանը, Ճգնաժամային կառավարման պետական ակադեմիայի ռեկտոր փ/ծ գնդապետ Համլետ Մաթևոսյանը: Ողջունելով փոխդեսպանին ԱԻ նախարարությունում, Դավիթ Կարապետյանը համառոտ պատմեց վերջին մի քանի տարիների ընթացքում ԱԻ նախարարության ձեռքբերումների և այն ծրագրերի մասին, որոնք առաջիկայում պետք է կյանքի կոչվեն: Խոսքը, մասնավորապես, վերաբերում է ԱԻՆ Ճգնաժամային կառավարման կենտրոնների աշխարհագրության ընդլայմանը, ինչպես նաև Գառնու երկրաֆիզիկական դիտարանի բացմանը, Ստեփանավանում ԱԻ նախարարության օդանավակայանի գործարկման աշխատանքներին:
ԱԻՆ-ը նպատակ ունի նաև ունենալ միջազգային ԻՆՍԱՌԱԳ չափանիշներին համապատասխան փրկարարական թիմ, որը հնարավորություն կունենա փրկարարական աշխատանքներ իրականացնել նաև արտասահմանում: Դավիթ Կարապետյանը հույս հայտնեց, որ այսպիսի աշխատանքային հանդիպումները նոր խթան կհանդիսանան հայ-անգլիական արդյունավետ փոխգործակցությունը նաև արտակարգ իրավիճակների ոլորտում ընդլայնելու համար: Ամիաս Մուռեսը շնորհակալություն հայտնեց ջերմ հյուրընկալության համար և նշեց, որ այսօր Արտակարգ իրավիճակների նախարարությունը լավագույն նախարարություններից է ՀՀ-ում, ինչի վկայությունն է այն բարձր վստահությունը, որ նախարարությունը վայելում է հասարակության շրջանում: Փոխդեսպանի խոսքով, ՀՀ ԱԻ նախարարության գործունեությունը մշտապես գտնվում է իրենց ուշադրության կենտրոնում, և իրենք մտադիր են համագործակցության նոր դաշտ ստեղծել նախարարության հետ, ինչի վկայությունն է Ամիաս Մուռեսի այս այցը: Տեղի ունեցավ ակտիվ քննարկում, որի ընթացքում կողմերը մտքեր փոխանակեցին գործակցության հնարավոր ուղիների մասին: Ճգնաժամային կառավարման պետական ակադեմիայի ռեկտոր Համլետ Մաթևոսյանը նշեց, որ ակադեմիան հավակնում է դառնալ տարածաշրջանային կրթական կենտրոն և ցանկալի կլիներ անգլիացի գործընկերների աջակցությամբ անգլերեն լեզվի խորացված դասընթացներ անցկացնել ինչպես ակադեմիայի ուսանողների, այնպես էլ դասախոսների համար:
ԱԻ ՓԾ տնօրենի տեղակալ, գեներալ- մայոր Նիկոլայ Գրիգորյանը իր խոսքում կարևորեց փորձի փոխանակման անհրաժեշտությունը, և առաջարկեց ձևավորել մասնագիտական աշխատանքային խմբեր, որոնք տեղերում կծանոթանան արտակարգ իրավիճակների կառավարման ոլորտում կողմերի գրանցված հաջողություններին և հնարավորության դեպքում կկիրառեն դրանք: Նիկոլայ Գրիգորյանի նշեց, որ հայկական կողմը բաց է համագործակցության համար իր գործընկերների հետ, որը միշտ էլ օգտակար է հատկապես փրկարար ծառայության ոլորտի մշտական բարեփոխման ճանապարհին: Մեծ Բրիտանիայի փոխդեսպան Ամիաս Մուռեսը և ԱԻ նախարարի տեղակալ Դավիթ կարապետյանը հույս հայտնեցին, որ նմանօրինակ հանդիպումները կկրեն շարունակական բնույթ և պայմանավորվեցին կազմել գործողությունների կոնկրետ ծրագիր, որի միջոցով արտակարգ իրավիճակների ոլորտում կողմերի համագործակցությունը կդառնա ավելի համակարգված:
ՈՒՂԻՂ ԵԹԵՐ
Ամենադիտված 
Պաշտոնանկություն՝ Նիկոլ Փաշինյանի որոշմամբ
