Հայաստանի և Արցախի երկու դպրոցի մանկավարժները միասին նշեցին ՀՀ անկախության տոնը

ՀՀ Գեղարքունիքի մարզի Զոլաքար գյուղի թիվ մեկ և Արցախի Հանրապետության Բերդաշեն գյուղի միջնակարգ դպրոցների միջև ստեղծված բարեկամությունը սկզբնավորվել է Հայաստանի Հանրապետության Գեղարքունիքի մարզի և Արցախի Հանրապետության Մարտունու շրջանի ղեկավարությաունների միջև 2008 թվականին ստորագրված առևտրատնտեսական և կրթամշակութային համագործակցության հուշագրի շրջանակներում:

Անցած վեց տարիների ընթացքում կայացած հաճախակի փոխադարձ այցելությունների արդյունքում կողմերի միջև ստեղծվել է կայուն փոխգործակցություն և անքակտելի բարեկամական կապ: Երկու կողմերն ամեն տարվա սեպտեմբերի 21-ին պարտադիր իրար հանդիպում և Հայաստանի Հանրապետության Անկախության տոնը համատեղ նշում են Հայաստանում կամ Արցախում: Ինչպես «Արմենպրես»-ին տեղեկացրեց Զոլաքարի թիվ մեկ միջնակարգ դպրոցի տնօրեն Թամարա Սողոյանը, այս տարի, համաձայն նախնական պայմանավորվածության, երկու կողմերի մանկավարժները սեպտեմբերի 21-ին միմյանց հանդիպեցին Խոր Վիրապում:

Զոլաքարցիները ներկայացել էին 25, բերդաշենցիները՝ 20 մանկավարժներով: Նրանք այցելեցին Զանգակատուն՝ Պարույր Սևակի տուն-թանգարան, Վազգեն Սարգսյանի տուն-թանգարան, Նորավանք, ապա ռեստորաններից մեկում հանդիսավորությամբ նշեցին Հայաստանի Հանրապետության Անկախության տոնը: Բերդաշենի մանկավարժներն այս գիշեր կհյուրընկալվեն զոլաքարցի իրենց գործընկերների տներում և Արցախ կճանապարհվեն սեպտեմբերի 22-ի վաղ առավոտյան: