ԱԺ նախագահը ՀԱԿ խմբակցության ղեկավարի հայտարարությունը «մանկական հրճվանք ապրել» է համարում

ՀԱԿ խմբակցության ղեկավար Լևոն Զուրաբյանի այն հայտարարությանը, թե հոկտեմբերի 10-ի հանրահավաքը ձնագնդի նման մեծացող գործընթաց է և իշխանություններն արդեն վախեցած են, վկայում է այն մասին, որ նա մանկական հրճվանք է ապրում: Այս կարծիքը ՀՀ Ազգային ժողովում, լրագրողների հետ զրույցում հայտնեց ԱԺ նախագահ Գալուստ Սահակյանը:

«Ես կարծում եմ, որ Լևոն Զուրաբյանը մանկական հրճվանք է ապրում, որովհետև չի կարելի ԲՀԿ-ի թևի տակ մտնել և հոխորտալ, որ կարող են ինչ-որ գործողություններ ծավալվել»,- «Արմենպրես»-ի հաղորդմամբ՝ նշեց Գալուստ Սահակյանը:

ԱԺ նախագահն ընդգծեց, որ քառյակի գործունեության մեջ վճռորոշ է ԲՀԿ-ի դերը: Միևնույն ժամանակ, ԱԺ նա նկատեց, որ ԲՀԿ-ն երբեք նման հայտարարություններ չի անում: «ՀԱԿ-ը իրեն համոզել է, որ կարող է ինչ-որ բան փոխել և փշրանքներից օգտվել: ՀԱԿ-ը յոթ հոգանոց խմբակցություն է, բայց ես չեմ տեսել, որ նրանցից 3-ը միասնական կարծիք հայտնի»,- նկատեց Գալուստ Սահակյանը:

ԱԺ նախագահն այն կարծիքին է, որ «Հանրապետական»-ը դեռ երկար ժամանակ կարևոր դերակատարում կունենա Հայաստանում: Հարցին, թե Վահրամ Բաղդասրայանին հաջողվոո՞ւմ է հանրապետականներին բերել նիստին դահլիճ և կազմակերպել պատշաճ քվեարկություն, ԱԺ նախագահը պատասխանեց. «Նույնիսկ եթե որևէ քվեարկություն ընդդիմությունը կարողանա ձախողել, դա ձախողում չէ, որովհետև նույն օրինագիծը նորից շրջանառության մեջ է դրվում: Մամուլում լուրեր են շրջանառվում, թե քառյակը իր գործունեությամբ ձախողում է Ազգային ժողովի բնականոն աշխատանքը, բայց ասեմ, որ իրենց այդ տեսակետն է ձախողումը»,- նշեց ԱԺ նախագահը:

Գալուստ Սահակյանը վստահ հայտարարեց, որ չի թույլատրի, որ ԱԺ-ում աշխատանքների ձախողում լինի: Դիտարկմանը, թե, թույլ չտալ ասելով, նկատի ունի' պետք է զանգի պատգամավորներին և հերթով նիստերի դահլիճ հրավիրի, Սահակյանն այսպես արձագանքեց. «Չէ, դա հարսանիք չէ, որ զանգես, ասես' ով է գալիս հարսանիքին, և ով' ոչ: Հանրապետականն իր ռազմավարությունն ունի և ցանկացած պայմաններում կարողանում է այդ ռազմավարությունը համապատասխանեցնել իրավիճակին: Այնպես չի, որ պատգամավորի գալ-չգալով է գործում «Հանրապետականը»: