Մանվել Բադեյանն ազնիվ քայլ համարեց «Նոր ժամանակներ» կուսակցության՝ ընտրություններին չմասնակցելը

«Պետք չէ գնալ ընտրություններին իմանալով, որ կպարտվեն, կպարտվեին նաւ «Նոր ժամանակները»», - այսօր լրագրողների հետ հանդիպման ժամանակ ասաց ԱԺ պատգամավոր Մանվել Բադեյանը: Նրա խոսքերով «Նոր ժամանակներ» կուսակցության ընտրություններին չմասնակցելը գնահատելի քայլ է, ազնիվ քայլ:

Ասուլիսի մյուս բանախոս, «Նոր ժամանակներ» կուսակցության ղեկավար Արամ Կարապետյանն իր հերթին նշեց. «Մեր կուսակցությունը չի մասնակցելու ընտրություններին, իսկ ես ոչ համամասնականով, ոչ մեծամասնականով չեմ առաջադրվելու»:

Արամ Կարապետյանի խոսքերով՝ իրենց որոշումը քաղաքական էր. «Բացատրություններն ինչպիսին էլ կլինեն, մեզ չեն հետաքրքրում: Մնացած կուսակցություններից ոչ մի բանով ավել կամ պակաս չենք: Մենք չենք ցանկանում վիճել փողի հետ, չինովնիկական իրավիճակի հետ»:

Անդրադառնալով առաջիկա ընտրություններին՝ Կարապետյանն ասաց. «Բոլորը սպասում են ընտրություններին՝ հավատալով, որ ընտրություններով Հայաստանում ինչ–որ բան կարող է փոխվել: Ընտրություններով որևէ բան փոխելն անհնար է»:

ԱԺ պատգամավոր Մանվել Բադեյանն իր հերթին հայտնեց, որ «տնտեսական կտրուկ փոփոխություններ ընտրություններից հետո չեն կարող լինել»: