«Գրողի ծոցը վավերացնեք»-ը Էրդողանին հասկանալի ոճով էր ասված. Կիրո Մանոյան

ՀՅԴ Հայ դատի քաղաքական հարցերի պատասխանատու Կիրո Մանոյանը դրական և ուժեղ է որակում ՀՀ նախագահ Սերժ Սարգսյանի' Միավորված ազգերի կազմակերպության (ՄԱԿ) Գլխավոր ասամբլեայի 69-րդ նստաշրջանի ելույթը: «Արմենպրես»-ի հետ զրույցում Կիրո Մանոյանն ասաց, որ Նախագահի ելույթում կային ճիշտ շեշտադրումները թե’ հայ-թուրքական հարաբերությունների, թե’ Արցախյան հիմնահարցի հետ կապված:

«Նախագահն այդ բարձր ատյանից բացահայտեց Ադրբեջանի քաղաքականությունը: Շատ հատկանշական է, որ ԼՂ հակամարտության հարցի առնչությամբ Սարգսյանը խոսեց ՄԱԿ-ի անվտանգության խորհրդի բանաձևերի մասին և շեշտեց, որ Ադրբեջանը չի կատարում բանաձևերի պահանջները: Կարևոր էր նաև այն, որ նախագահն ասաց, որ Ադրբեջանը դժգոհ է ԵԱՀԿ Մինսկի խմբի համանախագահների առաջարկներից և փորձում է հարցը տեղափոխել անտեղյակ, ես կավելացնեի նաև կաշառվող ատյան»,- ասաց Կիրո Մանոյանը:

Նրա դիտարկմամբ' նախագահը շատ ճիշտ շեշտադրումներ կատարեց նաև հայ-թուրքական հարաբերությունների մասին խոսելիս: Կիրո Մանոյանի խոսքով` նախագահը տեղին պատասխան տվեց Թուրքիայի կեղծ ցավակցություններին և բացահայտեց արդարության, պատմական անցյալի ու վշտի մասին թուրքական արտահայտությունների էությունը: Ինչ վերաբերում է «գրողի ծոցը վավերացնեք» արտահայտությանը, ըստ Մանոյանի, այն ոչ միայն ուղղված էր Թուրքիայի նախագահ Ռեջեփ Թայիփ Էրդողանին, այլև Էրդողանին հասկանալի ոճով էր ասված:

«Ողջունելի է, որ պաշտոնական Երևանում քննարկվում է արձանագրությունները Ազգային ժողովից հետո կանչելու հարցը: Վստահ չեմ, որ դա նշանակում է նաև ստորագրության հետ կանչում, իսկ մեր ակնկալիքն ու պահանջը հենց դա է, քանի որ Հայաստանի ստորագրությունը հետ կանչելով կդրվի վերջակետ: Ինչ վերաբերում է «Գրողի ծոցը վավերացնեք» արտահայտությանը, ապա ճիշտ պատասխան էր Թուրքիայի նախագահի ոճին: Այս բառերով նախագահը ներկայացրեց հասարակության տեսակետը Թուրքիայի այն դիրքորոշմանը, որ սահմանի բացումն ու հարաբերությունների հաստատումը կապում են Ղարաբաղի հարցի հետ»,- ասաց Մանոյանը' հավելելով, որ ճիշտ կլիներ ելույթում օգտագործել նաև հետևանքների վերացում արտահայտությունը:

Ըստ նրա, նախագահի ելույթին լուրջ ուշադրություն կդարձնեն քաղաքական կուսակցություններն ու քաղաքական գործիչները, քանի որ, բազմիցս ելույթ ունենալով ՄԱԿ-ի ամբիոնից, Հայաստանի նախագահն առաջին անգամ նման աննախադեպ ելույթ ունեցավ և ելույթի ձևն ու շեշտադրումները վստահաբար պետք է գրավեն միջազգային տարբեր ուժերի ուշադրությունը:

Սեպտեմբերի 24-ին Նյու Յորքում ՄԱԿ-ի Գլխավոր ասամբլեային 69-րդ նստաշրջանում ելույթ է ունեցել ՀՀ Նախագահ Սերժ Սարգսյանը և անդրադարձել հայ-թուրքական հարաբերություններին և ԼՂ հակամարտությանը: Նախագահը հայտարարել է, որ Հայաստանը լրջորեն մտադրվել է հետ կանչել 2009թ. հոկտեմբերի 10-ին Ցյուրիխում ստորագրված արձանագրությունները խորհրդարանից: