«Երկու ժամ Վարդապետի աշխարհում». Չարենցի անվան թանգարանում կնշվի Կոմիտասի 145-ամյակը

Եղիշե Չարենցի անվան գրականության և արվեստի թանգարանի Կոմիտասյան սրահում սեպտեմբերի 26-ին տեղի կունենա Կոմիտասի ծննդյան 145-ամյակին նվիրված «Երկու ժամ Վարդապետի աշխարհում» խորագրով համերգ-ցուցադրությունը: Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, «Կոմիտաս. Հայտնի և անհայտ» խորագիրը կրող ցուցադրության մեջ ներկայացված ավելի ք ան վեց տասնյակ նյութերի զգալի մասը ցուցադրվելու է առաջին անգամ: Կոմիտասի կյանքը և ստեղծագործությունները երևի թե ամենից շատ են ուսումնասիրվել, ընթերցվել, լուսաբանվել, մեկնաբանվել և հրատարակվել, բայց, այդ ամենով հանդերձ, Կոմիտասը որպես երևույթ շատ անհայտներ ունի իր մեջ:

Այս ցուցադրությամբ փորձ է արվելու ուսումնասիրողներին ուղղորդել դեպի այդ անհայտների բացահայտումը: Ասվածի վառ օրինակներ են Կոմիտասի ինքնակենսագրականների երեք՝ բոլորովին տարբեր օրինակները, ֆրանսիացի կոմպոզիտորիների կողմից արված կոմիտասյան երկերի մշակումները, «Հայ քնար» միաձայն երգերի առաջին տասնյակի մակետը և այլն: Առաջին անգամ ցուցադրվելու են մի շարք լուսանկարներ, որոնցից ուշադրության են արժանի հատկապես Պողոսյան վարժարանում Կոմիտասի լուսանկարը ուսուցիչների հետ՝ արված 1911թ., Կոմիտասի ազգականների խ մբանկարը (պատճեն), Կոմիտասի աշակերտներից երեքի՝ Բարսեղ Կանաչյանի, Վարդան Սարգսյանի և Միհրան Թումաճյանի ջանքերով կազմած 400 երգիչներից բաղկացած երգչախմբի լուսանկարը, որն արվել է 1919թ. Պոլսի համերգից հետո: Քիչ ցուցադրված մասունքներից է նաև Կոմիտասի բրոնզաձույլ մահադիմակը:

Կոմիտասի նորովի բացահայտմանն են ուղղված լինելու թավջութակահար, ՀՀ ժողովրդկան արտիստուհի Մեդեա Աբրահամյանի և դիրիժոր, երաժշտագետ, ՀՀ արվեստի վաստակավոր գործիչ Դանիել Երաժիշտի դասախոսությունները: Միջոցառումը կշարունակվի Կոմիտասի անվան լարային քառյակի համերգով (ղեկավար Էդուարդ Թադևոսյան) և կոմիտասյան երգերի կատարումներով՝ Մարիամ Կանայանի մատուցմամբ: Վերջում կցուցադրվի «Գութաներգ» խորագրով տեսաֆիլմը: Միջոցառումն անցկացվում է «Եվրոպական ժառանգության օրեր» ծրագր ի շրջանակներում: