«Ժողովուրդ». «Վազգեն Խաչիկյանին պատժում են, որ անուններ չտա»

Ամբաստանյալի աթոռին հայտնված ՀՀ աշխատանքի և սոցիալական ապահովության պետական ծառայության նախկին պետ Վազգեն Խաչիկյանին, ըստ էության, որոշել են պատժել ոչ միայն յուրացումների, այլև՝ հանկարծ չփորձի անցանկալի անուններ տալ: Գրում է «Ժողովուրդ»-ը:

Հիշեցնենք, որ Վազգեն Խաչիկյանին մեղադրանք էր առաջադրվել, որ նա, 2005թ. հունվարի 14-ից մինչև 2010թ. դեկտեմբերի 17-ը կեղծ դիմումներ պատրաստելով՝ կենսաթոշակառուների ստորագրությունները կեղծելու միջոցով հափշտակել էր ընդհանուր՝ 260 մլն 956 հազար ՀՀ դրամ գումար: Բացի այդ, Վազգեն Խաչիկյանը խարդախությամբ հափշտակել էր պետական բյուջե վերականգնման ենթակա, առանձնապես խոշոր չափերի' 29 մլն դրամ գումարը: Այս արարքի համար Խաչիկյանին մեղադրանք էր առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին և 2-րդ կետերով՝ խոշոր չափերի յուրացում, 178-րդ հոդվածի 3-րդ մասի 1-ին կետով՝ խոշոր չափերի խարդախություն, և 314-րդ հոդվածով՝ պաշտոնական կեղծիքի հատկանիշներով:

Շուրջ 1, 5 տարի Կենտրոն և Նորք- Մարաշ վարչական շրջանների ընդհանուր իրավասության դատարանում քննվող այս գործը նոր ընթացք է ստանում: Երեկ դատարանը Խաչիկյանին և այս գործով անցնող ամբաստանյալներ Աշոտ Աբրահամյանին, Հովհաննես Գրիգորյանին և Սամվել Էլբակյանին նոր, առավել խիստ մեղադրանք առաջադրեց: Նրանց առաջադրված 3 հոդվածներով մեղադրանքներին գումարվեց 4-րդը՝ ՀՀ ՔՕ 38-րդ հոդվածը, որը վերաբերում է պաշտոնական կեղծիք կազմակերպելուն: Այսինքն՝ նրանք իրականացրել էին պաշտոնական կեղծիք, հիմա մեղադրող կողմը համոզված է, որ նաև կազմակերպել են: Սրա հետևանքով 7 մլն դրամով ավելացվել է նաև յուրացված գումարի ընդհանուր չափը:

Բայց սա դեռ վերջը չէ: Երեկ դատարանում «Ամերիա» բանկի ներկայացուցիչը ներկայացրեց բանկի գլխավոր տնօրեն Արտակ Հանեսյանի դիմում-բողոքը, ըստ որի' Վ. Խաչիկյանը չի կատարել բանկի նկատմամբ մոտ 60 մլն ՀՀ դրամի վարկային պարտավորությունը: Պարզվում է, որ Վազգեն Խաչիկյանը վարկ էր վերցրել՝ Երևանի Աբովյան փողոցի վրա գտնվող իր բնակարանը գրավադրելով, սակայն երբ կալանավորվել է, նրա բնակարանի վրա կալանք է դրվել: Այսինքն՝ Խաչիկյանը հայտնվելով դատարանում, չի կարողացել կատարել իր վարկային պարտավորությունները, ինչի հետևանքով երեկ դատարանում բանկի ներկայացուցիչը միջնորդություն ներկայացրեց՝ խնդրելով Խաչիկյանի բնակարանի վրայից հանել արգելանքը, որպեսզի բանկը կարողանա վաճառել այն և մարել կուտակված պարտքը: Դատարանն էլ որոշեց բավարարել բանկի միջնորդությունը: Ասել է թե՝ մեղադրանքը խստացրեցին, յուրացման գումարը ավելացրեցին հերիք չէ, բնակարանն էլ վերցրեցին Խաչիկյանի ձեռքից:

Շարունակությունը՝ թերթի այսօրվա համարում