Իրանը և «վեցյակը» շատ մոտ են միջուկային խնդրի լուծմանը. Շտայնմայեր

Գերմանիայի արտաքին գործերի նախարար Ֆրանկ-Վալտեր Շտայնմայերը Նյու Յորքում Իրանի նախագահ Հասան Ռոուհանիի հետ կայացած հանդիպումից հետո հայտարարել է, որ Իրանը և միջազգային միջնորդների «վեցյակը» «դեռ երբեք այսքան մոտ չեն եղել» միջուկային հարցի շուրջ գործարքի կնքմանը: Այդ մասին, ինչպես տեղեկացնում է «Արմենպրես»-ը, սեպտեմբերի 26-ին հաղորդել է Reuters գործակալությունը:

«Նախկինում երբեք մենք այսքան մոտ չենք եղել գործարքը կնքելուն, որքան այժմ: Բայց ճշմարիտ է, որ բանակցությունների եզրափակիչ փուլն ամենաբարդն է: Եկել է այդ հակամարտությանը վերջ դնելու ժամանակը: Հուսով եմ, որ Իրանը, ելնելով աշխարհի և Մերձավոր Արևելքի իրադրությունից, գիտի և զգում է, որ բանակցությունների ձախողումն այժմ պարզապես անթույլատրելի է»,- հայտարարել է Շտայնմայերը:

Սեպտեմբերի 25-ին Իրանի նախագահը հույս է հայտնել, որ Իրանի և «վեցյակի» միջև համաձայնությունը կարող է ձեռք բերվել «կարճ ժամանակում»: Ռոուհանին նաև նշել է, որ Իրանը կշարունակի խաղաղ միջուկային ծրագիրը, ներառյալ ուրանի հարսացումը, հաղորդել է ՌԻԱ Նովոստին: