ԱԺ հանձնաժողովը հետաձգեց Զարուհի Փոստանջյանի նոր նախագծի քննարկումը

Ազգային ժողովի արտաքին հարաբերությունների հանձնաժողովը հեղինակի համաձայնությամբ որոշեց մեկ տարով հետաձգել «Ժառանգություն» խմբակցության պատգամավոր Զարուհի Փոստանջյանի ներկայացրած՝ Լեռնային Ղարաբաղի և Հայաստանի Հանրապետությունների անվտանգության ապահովման ռազմաքաղաքական հիմնադրույթների հայեցակետերի մասին ԱԺ որոշման նախագծի' ԱԺ օրակարգ ներառումը: ԱԺ արտաքին հարաբերությունների հանձնաժողովի նիստի ընթացքում հեղինակին առաջարկվեց վերամշակել նախագիծը:

Ներկայացնելով նախագիծը` Փոստանջյանն ընդգծեց, որ առաջարկվում է, որպեսզի Ազգային ժողովը, հաշվի առնելով միջազգային և ռազմաքաղաքական իրադրությունը, մասնավորապես՝ Լեռնային Ղարաբաղի և Հայաստանի Հանրապետությունների նկատմամբ սպառնալիքներն ու մարտահրավերները՝ որոշում կայացնի ճանաչել Լեռնային Ղարաբաղի Հանրապետությունը: «Նաև առաջարկում ենք, որպեսզի Ազգային ժողովը որոշում կայացնի բացառել Լեռնային Ղարաբաղի և Հայաստանի Հանրապետությունների պետական սահմաններին այլ պետությունների կամ միջազգային կազմակերպությունների կողմից անցակետերի (սահմանապահ, մաքսային և այլն) տեղակայումը, բացառել Լեռնային Ղարաբաղի և Ադրբեջանի Հանրապետության սահմաններին այլ պետությունների կամ միջազգային կազմակերպությունների կողմից զինված ուժերի տեղակայումը»,- «Արմենպրես»-ի հաղորդամբ՝ ասաց Փոստանջյանը:

Նախագծով առաջարկվում է, որ ԱԺ-ն որոշում ընդունի բացառել Հայաստանի Հանրապետության անդամակցությունը կամ միավորումը որևէ կառույցի, որը կվտանգի Լեռնային Ղարաբաղի և Հայաստանի Հանրապետությունների ինքնիշխանությունը կամ տարածքային ամբողջականությունը:

Որպես հիմնավորում պատգամավորը նշեց, որ հաշվի առնելով միջազգային և ռազմաքաղաքական իրադրությունը, մասնավորապես՝ Լեռնային Ղարաբաղի և Հայաստանի Հանրապետությունների նկատմամբ սպառնալիքներն ու մարտահրավերները' առաջարկվում է ապահովել ԼՂՀ ճանաչման օրակարգային պահանջը, ինչպես նաև բացառել ԼՂՀ և ՀՀ տարածքների վրա զինված լայնածավալ հարձակումը: