Կապանի թվով 7 ակումբ-գրադարանին համակարգիչներ են տրամադրվել

Կապանում գործող 15 գրադարաններից եւ ակումբ-գրադարաններից 7-ը ստացան համակարգչային տեխնիկա եւ ապահովվեցին մեկ տարի անվճար ինտերնետ կապով: Ծրագիրը, որն իրականացնում է «Կապանի փոքր ֆերմերների ասոցիացիա» հկ-ն, կոչվում է «Բարելավել Կապանի տարածաշրջանի ակումբ-գրադարանների գործունեությունը ժամանակակից տեխնոլոգիաների կիրառմամբ»:

«Մեր նպատակն է ոչ միայն խթանել քաղաքի ակումբ-գրադարանների գործունեությունը, այլեւ դրանք դարձնել տեղեկատվական կենտրոններ, քաղաքացիներին ներգրավել եւ մասնակից դարձնել համայնքային կյանքին, նպաստել գրադարանների աշխատակազմի կարողությունների զարգացմանը: Իրականացված ծրագիրը կնպաստի նաեւ գրադարանների ընթերցողների թվի աճին», - «Արմենպրես»-ի հետ զրույցում ասաց ՀԿ գործադիր տնօրեն, ծրագրի ղեկավար Արմինե Հակոբյանը:&nb sp; Այն ֆինանսավորվում է ԱՄՆ դեսպանատան Ժողովրդավարության հանձաժողովի փոքր դրամաշնորհի կողմից: Ծրագրի շրջանակում 4 գրադարաններում կազմակերպվել է ուսուցում, որին մասնակցել է մոտ 30 մարդ՝ գրադարանի աշխատակիցներ եւ թաղամասի բնակիչներ: Ծրագրի հաջորդ փուլում եւս 3 գրադարանում կկազմակերպվի ուսուցում, որից հետո կանցկացվի մեկ դասընթաց՝ մասնակցային կառավարման վերաբերյալ: Այն նպատակ ունի զարգացնել քաղաքացիների կարողությունները, որպեսզի մասնակցեն համայնքի կառավարմանը:

«Կկազմակերպվեն քննարկումներ, կընտրվի թաղամասին կամ համայնքին մտահոգող մեկ խնդիր, կհրավիրվեն շահագրգիռ կողմեր եւ կառաջարկվեն լուծումներ», - ասաց Հակոբյանը: Ծրագրի շրջանակում գրադարանները կհամալրվեն նաեւ նոր գրականությամբ: Արդեն գրադարանները ՀԿ-ին ներկայացրել են բնակչության կողմից մեծ պահանջարկ ունեցող գրքերի ցանկը, որոնք ձեռք բերելուց անմիջապես հետո կբաշխվեն հասցեատերերին: Գրականությունն ամբողջովին նոր է՝ հիմնականում հայերեն: Գեղարվեստական գրքերից բացի, կան նաեւ մասնագիտական գրքեր՝ տնտեսագիտության, հոգեբանության վերա բերյալ:

Ծրագիրը մեկնարկել է ընթացիկ տարվա հուլիսի 1-ին եւ կավարտվի 2015-ի հունվարի 31-ին: Այն արժե 22 հազ. դոլար, որից 4 հազ. դոլարը կազմակերպության ներդրումն է:

Գոհար Իսախանյան