«Սահմանադրական բարեփոխումներ կոչվածը ոչ այլ ինչ է, քան փաստաթուղթ Սերժ Սարգսյանի՝ ցմահ իշխանության մասին»

ՀՀ մարզերում շարունակվում են ոչ իշխանական եռյակի հանդիպումները քաղաքացիների հետ: Ոչ իշխանական եռյակն այսօր Կապանում էր: Կապանցիների հետ հանդիպմանը խոսքով հանդես եկավ ՀԱԿ մամուլի խոսնակ Արման Մուսինյանը: Վերջինս դիմելով քաղաքացիներին՝ նշեց, որ ուզում է տեղեկացնել, թե ում հետ գործ ունեն.

«Հայաստանում այսօր իշխում է մի ռեժիմ, որը, առաջինը՝ բռնանում է ժողովրդի կամքի վրա և հեևողականորեն կեղծում է բոլոր ընտրությունները՝ ՏԻՄ ընտրություններից մինչև նախագահական ընտրությունները, երկրորդ՝ իր ձեռքում է կենտրոնացրել ամբողջ տնտեսական համակարգը՝ միջին, մանր, խոշոր գործարարներին զրկելով ազատ ձեռներեցությամբ զբաղվելու հնարավորությունից: Երրորդ՝ ժողովրդին մատնել է ծանր, մղձավանջային սոցիալական պայմանների և դրանից բխող՝ արդեն ազգային անվտանգությանը սպառնացող արտագաղթի: Չորրորդ՝ ամեն Աստծու օր ոտնահարվում է ՀՀ Սահմանադրությունը և մնացած օրենքները: 5-րդ՝ ըստ էության ավերել է գյուղը, այսօր հայաստանյան գյուղերն ամայացել են, վարելահողերի մեծ մասը չի մշակվում, մարդիկ մատնված են հարկադիր արտագաղթի»,- նշեց Մուսինյանը:

ՀԱԿ մամուլի խոսնակի կարծիքով՝ այդ ամենն իշխանությունն անում է մեկ նպատակով՝ պահել իշխանությունը և հարստանալ:

«Դրանից բացի իշխանությունն ունի մեկ նպատակ ևս, որը փորձում էր հետևողականորեն իրագործել մինչև վերջերս՝ մասնատել երկրի քաղաքական դաշտը, այնպես անել, որ քաղաքական դաշտի այն ուժերը, որոնք մտահոգված են հասարակության խնդիրներով, երկրի խնդիրներով, այսօր չկարողանան միավորվել: Երկրորդը՝ մինչև վերջին աստիճանը հուսահատության մատնել ժողովրդին»,- ասաց Մուսինյանը: 

Նրա խոսքով՝ «Հայ ազգային կոնգրեսը», «Բարգավաճ Հայաստանը» և «Ժառանգությունը» խափանել են Սերժ Սարգսյանի և նրա վարչախմբի նպատակի առաջին մասը. «Ստեղծվել է աննախադեպ համախմբում՝ ընդդեմ այս վարչախմբի»:

Երկրորդ քայլը, որ իրենք պետք է անեն համախմբված քաղաքական ուժերի և հասարակության, այդ թվում՝ գործարարների, մտավորականության, մանր ու միջին բիզնեսի, ուսանողության, տարեցների, բոլորի միասնությունն  ապահովելն է. «Մենք այս խնդիրը պետք է լուծենք և այդ խնդիրը լուծելու ենք ի հեճուկս Սերժ Սարգսյանի, ի հեճուկս նրա վարչախմբի: Հոկտեմբերի 10-ին ապահովելու ենք առաջատար քաղաքական ուժերի՝ ՀԱԿ-ի, ԲՀԿ-ի, «Ժառանգության» և ձեր միասնությունն Ազատության հրապարակում»,- դիմելով կապանցիներին՝ ասաց Մուսինյանը: 

Այս միասնությամբ, ըստ Մուսինյանի, լուծվելու են հետևյալ խնդիրները.

«Վիժեցվելու ենք Սահմանադրական բարեփոխումներ կոչվածը, որը ոչ այլ ինչ է, քան փաստափուղթ Սերժ Սարգսյանի՝ ցմահ իշխանության մասին: Դա չի լինելու, մոռացեք, իմացեք, վստահ եղեք, որ Սերժի Սարգյսնի վարչախումբը «հույսները կտրեն»: Նոր Սահմանադրությունը չի լինելու, քանի դեռ վարչախումբը հեռացված չէ իշխանությունից և ձևավորված չէ նոր իշխանություն:

Հաջորդը՝ վիժեցնելով հանդերձ այդ ծրագիրը՝ մենք ուժեղացնելու ենք ճնշումն իշխանությունների վրա և հասնելու ենք ամբողջական իշխանափոխության»,- ասաց ՀԱԿ մամուլի խոսնակը:

Եզրափակելով իր խոսքը՝ Մուսինյանը նշեց. «Այն պահին, երբ ձեր ուսերը և ձեռքերը թափ տվեցիք, Սերժ Սարգսյանը հաղթելու է, իսկ երբ այն պահին, երբ ուղղեցիք ձեր մեջքը և պարզ երեսով մասնակցեցիք հոկտեմբերի 10-ի հանրահավաքին, իմացեք՝ այս վարչախմբի օրերը հաշված են»: