Տասնամյակների մոռացությունից կիսավեր կառույցի վերածված Վարագավանքը վերանորոգվել է «Իմեքս գրուպ» ՍՊԸ-ի ղեկավարների հովանավորությամբ

Նոր Վարագավանքը 13-րդ դարի հայկական վանական համալիր է Տավուշի մարզի Վարագավան գյուղի մոտակայքում՝ անտառապատ լեռներով շրջապատված բարձր ժայռի վրա

Սկզբից կոչվել է Անապատ։ Նոր Վարագավանք անունը ստացել է Վասպուրականի հռչակավոր Վարագավանքը մոնղոլների կողմից ավերելու պատճառով։ Վարագավանքի հոգևոր առաջնորդ Ղուկասը 1213 թ-ին Անապատ է տեղափոխել Վարագավանքում պահվող մասունքները, այդ թվում՝ Քրիստոսի Սուրբ Խաչափայտի կտորը, որ բերել էին Հռիփսիմյան կույսերը:

Հայ եկեղեցին ունի Խաչին նվիրված զուտ ազգային մի տոն, որը հայտնի է Վարագա Սուրբ Խաչ անունով: Այն միշտ տոնում են Խաչվերացից երկու շաբաթ հետո, այսինքն' սեպտեմբերի 25-ից մինչև հոկտեմբերի 1-ը հանդիպող կիրակի օրը:

Նոր Վարագավանքը, որ տասնամյակների մոռացությունից ու անկումից վերածվել էր կիսավեր կառույցի, այսօր նոր կյանք է ստացել, հառնել է իր ողջ վեհությամբ ու հմայքով: Արդեն 15 օրից եկեղեցին պատրաստ կլինի լիարժեք կատարել իր պարտականությունները: Շուրջ երկու տարի ընթացող վերականգնողական աշխատանքները հովանավորում են ԻՄԷՔՍ ԳՐՈՒՊ ՍՊԸ ղեկավարներ Նորայր Խաչատրյանն ու Ռաֆայել Մանուչարյանը: Բարերարներն անձամբ են հետեւում շինարարական աշխատանքների ընթացքին՝ հաճախակի այցելելով Վարագավանք: Վերջիններս համարում են, որ իրենց պարտքն են կատարել՝ ստանձնելով հայրենի հողի պատմական ու հոգևոր մեծագույն արժեքը վերականգնելու պատվաբեր հոգսը:

Վանքը հիմնել է Դավիթ Բ Կյուրիկյան թագավորը 1193-1198 թթ-ին, հետագայում համալիրն ավելի է մեծացրել թոռ' Վասակ Բ-ն 1234-1237 թթ-ին։ Վանքը Կյուրիկյան իշխանատոհմի տապանատուն է։ Շքեղ ձևավորում ունի գավթի շքամուտքը։ Այստեղ առկա է Արարատյան կողմնակալության կողմնակալ-հրամանատար, իշխանաց-իշխան Վաչե Ա Վաչուտյանի զույգ արծիվներով զինանշանը։ Հավանաբար Վաչե Ա-ն մեծարժեք նվիրատվություն է կատարել Նոր Վարագավանքին և դրան ի պատասխան նրա զինանշանը փորագրվել է գավթի պատին։