«Ժողովուրդը հոգնել է քաղաքական և տնտեսական իմիտացիաներից». Վահե Էնֆիաջյան

ՀՀ ԱԺ Բարգավաճ Հայաստան խմբակցության պատգամավոր Վահե Էնֆիաջյանի հայտարարությունը ԱԺ հայտարարությունների ժամին.

Յուրաքանչյուր անգամ, երբ Բարգավաճ Հայաստան խմբակցությունը հանդես է գալիս օրենսդրական առաջարկությունների փաթեթով, նախևառաջ իրականացնում է լուրջ և համապարփակ ուսումնասիրություն:

Հաշվի է առնում դրա սահմանադրության համապատասխանելիությունը, փորձագետների և ոլորտի գիտակների կարծիքները, միջազգային փորձը:

Սա չափազանց կարևոր է, քանզի մենք գիտակցում ենք, որ օրենսդրական ցանկացած փոփոխություն ունենում է հետևանք՝ մի դեպքում վատ, մյուսում՝ լավ:

Ցավալի է, բայց այս դահլիճում ընդունվող օրենքներից շատերը մեր ժողովրդի համար անընդունելի են, որին պարբերաբար ականատես ենք լինում Խորհրդարանի դիմաց կազմակերպվող բողոքի ցույցերից, երթերից և ընդվզման ակցիաներից:

Իսկ իշխանությունների կողմից ժողովրդի արդարացի ընդվզումն ու բողոքի խոսքն անտեսելը հանգեցնում է շղթայական հետևանքի: Փայքարի, հուսալքության և ի վերջո արտագաղթի:

Ժողովուրդը հոգնել է քաղաքական և տնտեսական իմիտացիաներից, հոգնել է չիրականացվող խոստումներից ու խաբված լինելու փաստից:

Շրջանառության հարկի մասին օրենքում փոփոխությունները ներկայացվում էին իբրև տնտեսական և հարկային լուրջ բարեփոխումներ, սակայն ինչպես տեսնում ենք, բարեփոխում անվան տակ ներկայացվող 3.5 տոկոս շրջանառության հարկը դարձնելով 1 տոկոս, փոքր և միջին ձեռներեցների համար ստեղծվեց հարկային ծուղակ:

Փաստաթղթաշրջանառությունը չափազանց բարդացվել է, որից տուժում է տոնավաճառի, փոքրիկ կրպակի և, առհասարակ, ՓՄՁ յուրաքանչյուր ներկայացուցիչ:

Սակայն սրան զուգահեռ, խստացվել են պատժիչ մեխանիզմները:

Երեկ և այսօր ականատեսը դարձանք զայրացած և հուսալքության գրկում հայտնված մեր ժողովրդի բողոքին, ովքեր անելանելի վիճակից բողոքի ցույց էին կազմակերպել Ազգային Ժողովի դիմաց, իսկ այդպիսի ցույցերի մենք ավելի ու ավելի շատ ենք ականատեսը լինում:

Երկիրն անդունդի եզրին է՝

1. Բնակչության շուրջ 1/3-տոկոսը հայտնվել է բանկային և վարկային ճահիճում

2. 40 տոկոսի շեմին մոտեցող աղքատության ցուցանիշը

3. 20 տոկոսի շեմին մոտեցող գործազրկությունը, որի շուրջ 25 տոկոսը մեր երիտասարդներ են

4. Հայաստանի Հանրապետության պետական պարտքը կազմում է 4,5 միլիարդ դոլար և օրեցօր ավելանում է, որի հետևանքները զգալու են գալիք սերունդները:

5. Տնտեսական մենաշնորները և անարդարության մթնոլորտը Մենք՝ վճռական ենք առաջադրված 12 կետերի իրականացմանը:

Մենք վճռական ենք կասեցնելու վերոնշյալ երևույթները և առաջնորդվելով հասարակության պահանջով՝ սեպտեմբերի 25-ին, մեկնարկած մարզային հանրահավաքները, դրա ապացույցն են, որն իր համաժողովրդական կիզակետին է հասնելու հոկտեմբերի 10-ին՝ ժամը 18:00-ին, Ազատության հրապարակում:

Մենք պայքարելու ենք ի շահ համընդհանուր նպատակի, հանուն մեր ժողովրդի, հանուն Հայաստանի Հանրապետության յուրաքանչյուր քաղաքացու: