Սպառողական շուկայում գրանցվել է 0.4 տոկոս գնաճ

Հայաստանի սպառողական շուկայում 2014թ. սեպտեմբերին օգոստոսի համեմատ արձանագրվել է 0.4 տոկոս գնաճ: Պարենային ապրանքների (ներառյալ ոգելից խմիչքներ և ծխախոտը) գներն աճել են 0.6 տոկոսով, ոչ պարենային ապրանքներինը՝ 0.9 տոկոսով, իսկ ծառայությունների ոլորտում գրանցվել է սակագների ընդհանուր մակարդակի 0.1 տոկոս նվազում:

Ինչպես «Արմենպրես»-ին տեղեկացրին ՀՀ ազգային վիճակագրական ծառայությունից, 2014թ. սեպտեմբերին 2013թ. դեկտեմբերի համեմատ սպառողական գների ինդեքսը կազմել է 99.2 տոկոս, այդ թվում' պարենային ապրանքներինը (ներառյալ ոգելից խմիչքները և ծխախոտը)՝ 97.5 տոկոս, ոչ պարենային ապրանքներինը՝ 99.2 տոկոս, ծառայությունների սակագներինը՝ 102.4 տոկոս։

2014թ. հունվար-սեպտեմբերին հանրապետության սպառողական շուկայում արձանագրվել է գների միջին ամսական 0.1 տոկոս նվազում (նախորդ տարվա նույն ժամանակահատվածում արձանագրվել է 0.4 տոկոս հավելաճ):

2014թ. սեպտեմբերին 2013թ. սեպտեմբերի համեմատ սպառողական գների ինդեքսը կազմել է 101.5 տոկոս, այդ թվում' պարենային ապրանքներինը' 101.4 տոկոս, ոչ պարենային ապրանքներինը' 100.9 տոկոս, ծառայությունների սակագներինը' 101.8 տոկոս, իսկ հունվար-սեպտեմբերին 2013թ. հունվար-սեպտեմբերի համեմատ' համապատասխանաբար 102.9 տոկոս, 101.6, 101.9 և 106.0 տոկոս:

2014թ. սեպտեմբերին 2010թ. համեմատ սպառողական գների ինդեքսը կազմել է 117.9 տոկոս, այդ թվում'պարենային ապրանքներինը՝ 117.9 տոկոս, ոչ պարենային ապրանքներինը՝ 114.1 տոկոս, ծառայությունների սակագներինը՝ 119.8 տոկոս: