Արտամարմնային բեղմնավորման ներդրումը Հայաստանում 10 տարվա պատմություն ունի

Արտամարմնային բեղմնավորման ներդրումը Հայաստանում արդեն 10 տարվա պատմություն ունի: Իրադարձության առթիվ «Արագիլ» վերարտադրողական բժշկության աջակցության հիմնադրամը հոկտեմբերի 3-ին անցկացրեց միջոցառում-գիտաժողով, որի ընթացքում մասնագետները քննարկեցին ոլորտի հաջողությունները, խոսեցին կատարած աշխատանքների և արդյունքների մասին: «Արագիլ» հիմնադրամի միջոցառումն իր ներկայությամբ պատվեց ՀՀ առաջին տիկին Ռիտա Սարգսյանը:

Մոր և մանկան առողջության պահպանման գիտահետազոտական կենտրոնի տնօրեն, պրոֆեսոր Գեորգի Օկոևը նշեց, որ կենտրոնի համար օրը նշանակալից է և կարևոր: «Տասը տարի առաջ ծնվեցին մեր առաջին երեխաները, որոնք լույս աշխարհ եկան արտամարմնային բեղմնավորման շնորհիվ: Այս տարի մենք նշում ենք ևս մեկ տոն. մեկ տարի առաջ շնորհիվ «Արագիլ» հիմնադրամի, լույս աշխարհ եկան ևս մի քանի փոքրիկներ: Այսօր հավաքվել ենք, որպեսզի անցկացնենք գիտապրակտիկ կոնֆերանս, որին մասնկացում են տարբեր երկրներից՝ Ֆրանսիայից, Ռուսաստանի Դաշնությունից, Ուկրաինայից, Վրաստանից: Մասնագետները կիսվելու են իրենց փորձով՝ արտամարմնային բեղմնավորման տեխնոլոգիաների մասին: Մենք ևս մեր փորձով ենք կիսվելու»,- «Արմենպրես»-ի փոխանցմամբ՝ նշեց Գեորգի Օկոևը:

Մոր և մանկան առողջության պահպանման գիտահետազոտական կենտրոնի տնօրենի խոսքով՝ հարյուրավոր երեխաներ են լույս աշխարհ են եկել շնորհիվ այս մեթոդի: «Մենք կարող ենք հպարտանալ և ասել, որ Հայաստանի Հանրապետությունն աշխատում է այն ստանդարտներով, որոնք ներդրված են զարգացած բոլոր երկրներում: Մենք անցյալ տարվանից այդ մեթոդին դիմող ընտանիքների կտրուկ աճ ենք զգում: «Արագիլ» հիմնադրամը բազմաթիվ ընտանիքների թույլ տվեց երեխաներ ունենալ»,- հավելեց նա:

ՀՀ առողջապահության նախարար Արմեն Մուրադյանն ընդգծեց, որ առանձնահատուկ ուրախություն է զգում, երբ դահլիճում տեսնում է այն երեխաներին, որոնք ծնվել այս ազնվաբարո գործունեության արդյունքում: «Տասը տարի առաջ առողջապահական համակարգի մեծ աշխատանքի արդյունքում ծնվեցին Հայաստանում առաջին արտամարմնային բեղմնավորմամբ լույս աշխարհ եկած երեխաները: Այսօր նրանք 10 տարեկան են: Մեկ տարի առաջ էլ ծնվեց մյուս եռյակը՝ այն հիանալի հիմնադրամի հետ համագործակցության արդյունքում, որը ղեկավարում է Ռիտա Սարգսյանը: Այս հիմնադրամի աշխատանքի արդյունքում ևս 55 կին մայրանալու սպասումներով է լի, և հենց այսօր հնարավոր է, որ Հայաստանում ունենանք երկու նորածին երեխաներ այս բարի աշխատանքի արդյունքում: Մեր կանայք այլևս կարիք չունեն մեկնել արտերկիր և այնտեղ սպասել իրենց մայրանալու իրավունքին»,- նշեց նախարարը:

Երեք երեխաների մայր Կարինա Մայսուրաձեն խոստովանում է, որ 13 տարի չէր կարողանում երեխա ունենալ: «Շնորհիվ մեր բժշկների ես ունեմ երեք երեխա: Անցել է 10 տարի, մենք այստեղ ենք և շնորհակալ ենք հրավերի համար: Հավատում էի, որ նման արդյունք կլինի»,- նշեց նա:

Բժշկական գիտությունների դոկտոր, պրոֆեսոր, «Արագիլ» հիմնադրամի հոգաբարձուների խորհրդի անդամ Կարինե Թոխունցն էլ ընդգծեց, որ կատարվել է արդեն արտամարմնային բեղմնավորման 140 ցիկլ, որոնց արդյունքում ծնվել է 28 երեխա: «Տվյալ պահին զարգացող հղիություններ ունենք, արդյունքները լավն են, և մենք ցանկանում ենք քննարկել դրանք»,- նշեց Կարինե Թոխունցը:

«Արագիլ» վերարտադրողական բժշկության աջակցության հիմնադրամը շահույթ չհետապնդող կազմակերպություն է, որն ունի առողջապահական, բարեգործական և այլ հանրօգուտ նպատակներ: Հիմնադրվել է 2011թ. ապրիլի 18-ին՝ հիմնադրի որոշմամբ: Հիմնադիրն է «Վերարտադրողական բժշկության հայկական ասոցիացիա» հասարակական կազմակերպությունը: