Եթե գա պահը, ու բաժանեն իշխանությունը՝ այդ ժամանակ դուք եռյակ չեք տեսնի. Վահրամ Բաղդասարյան

«ՀՀԿ-ն ԱԺ-ում մեծամասնություն է կազմում, իսկ առանց դրա բոլոր քաղաքակիրթ երկրներում դժվար կլինի որևէ ընտրություն կազմակերպել: Եթե կլինեն նոր ընտրություններ ու նոր մեծամասնություն՝ այդ ժամանակ ինքը թելադրողը կլինի»,- այսօր՝ լրագրողների հետ հանդիպման ժամանակ, ասաց ՀՀԿ խմբակցության ղեկավար Վահրամ Բաղդասարյանը՝ հավելելով. «Գաղտնիք չէ, որ հիմա քաղաքական կյանքի թելադրողը ՀՀԿ-ն է»:

Վահրամ Բաղդասարյանն անդրադարձավ նաև եռյակի հանրահավաքներին և Ռուբիկ Հակոբյանի ու Արամ Մանուկյանի հայտարարություններին, թե ժողովուրդն իշխանափոխություն է ուզում. «Նման ցանկություն ունեցողներն իրենց համակիրներն են, և բնական է, որ ընդդիմության համակիրները պետք է ցանկանան, որ իրենց կուսակցությունները գան իշխանության: Այսօր ՀՀԿ-ն ունի մեծ բանակ, որ իր կողքին է, բոլորն ուզում են գան իշխանության ու դառնան առաջին դեմք: Այդքան առաջին դեմքի տեղ չկա: Եռյակն իշխանություն է ուզում առանձին-առանձին, և եթե գա պահը, ու բաժանեն՝ այդ ժամանակ դուք եռյակ չեք տեսնի»,- ասաց Բաղդասարյանը: