Փոխվարչապետը ներկա գտնվեց Դիլիջան քաղաքի օրվա շրջանակում կազմակերպված միջոցառումներին

ՀՀ փոխվարչապետ, տարածքային կառավարման նախարար Արմեն Գևորգյանը երեկ՝ հոկտեմբերի 4-ին, Դիլիջանում ներկա է գտնվել քաղաքի հիմնադրման 470-ամյակի տոնական միջոցառումների շրջանակում կազմակերպված՝ երաժշտական դպրոցի վերակառուցված շենքի բացման արարողությանը: Այս մասին տեղեկացնում է ՀՀ տարածքային կառավարման նախարարության լրատվական ծառայությունը։

Փոխվարչապետը շնորհավորել է դիլիջանցիներին տոնի, ինչպես նաև համայնքային նոր կրթօջախի բացման կապակցությամբ: Նա վստահություն է հայտնել, որ հարմարավետ, անհրաժեշտ գույքով ապահովված դպրոցում սաները նաև լավ կրթություն ստանալու հնարավորություն կունենան : Փոխվարչապետը նաև ողջունելի է համարել համայնքի լուրջ մասնակցությունը ծրագրի իրականացմանը, ինչը, ըստ նրա, նշանակում է, որ համայնքը կարողանում է սեփական ուժերով համայնքային նշանակության կոնկրետ խնդիրներ լուծել:

Դպրոցի վերակառուցման և կահավորման համար ընդհանուր առմամբ պահանջվել է շուրջ 77 մլն դրամ, որի հիմնական մասը՝ 42 մլն դրամ, հատկացրել է համայնքը, մնացած մասը տրամադրել են Դիլիջանի զարգացման հիմնադրամն ու «Քաունթերփարթ ինթերնեշնլ» կազմակերպությունը:

Փոխվարչապետը շրջայց է կատարել շենքում, ծանոթացել պայմաններին: Ներկայումս դպրոցն ունի ավելի քան 60 սան: Նոր պայմանները թույլ են տալիս նաև դպրոցում կազմակերպել արհեստագործական դասընթացներ:

Ա. Գևորգյանն այնուհետև ներկա է գտնվել Դիլիջանի միջազգային դպրոցի (UWC) համալիրում կազմակերպված բաց դռների օրվա միջոցառմանը, որի ընթացքում հրավիրյալներին ու դիլիջանցիներին ներկայացվել են կրթահամալիրի պայմաններն ու հնարավորությունները: