Անիում եկեղեցիների պահպանման համար ստորագրահավաք է մեկնարկել

Անիի եկեղեցիներում պատմությունը խեղաթյուրվում է, հուշարձաններն ավերվում են և կերպարանափոխվում: Ահազանգը Համաշխարհային հայկական կոնգրեսից, Ռուսաստանի հայերի միությունից ու «Հայ ասպետ» կրթադաստիարակչական բարեգործական հիմնադրամից է: Հուշարձանները փրկելու կապակցությամբ www.armcongress.am կայքում մեկնարկել է ստորագրահավաք' կոչով կանգնեցնել Անիում հուշարձանների ավերումն ու կերպարանափոխումը:

«Թուրքիայի կառավարությունը մշակութային կոթողների վերականգման քողի տակ Անիի եկեղեցիների վերանորոգումը վստահել է թուրք և օտարազգի շինարարների, որոնք եկեղեցիների վրայից իսպառ վերացնում են առանց այն էլ համարյա ոչնչացված հայկական հետքերը՝ խաչեր, արձանագրություններ, որմնանկարներ և այլն: Թուրք զբոսավարները հայկական Անի ժամանած զբոսաշրջիկներին արձանագրությունները ներկայացնում են որպես վերացած անհայտ ժողովրդի թողած հետքեր, և պատմությունն ու արդարությունը խեղվում են ամեն պահ ու անպատիժ: Հաշվի առնելով այս ամենը, կոչ ենք անում Հայոց Մ եծ եղեռնի 100-րդ տարելիցին ընդառաջ ազգովի հանդես գալ պահանջատիրոջ կարգավիճակով և միջազգային հանրության ու ՅՈՒՆԵՍԿՕ-ի աջակցությամբ հասնել նրան, որ Անիի մշակութային կոթողների վերանորոգումը կատարվի հայ մասնագետների կողմից կամ նրանց մասնակցությամբ, որ Անիի Բագրատունի թագավորները չներկայացվեն որպես Բագրատօղլի փաշաներ, որ մատուցվի ճշմարիտ և իրական պատմությունը»,- ասված է հաղորդագրության մեջ:

«Միացիր և միացրու» կարգախոսով միության և հիմնադրամի ներկայացուցիչները դիմում են Միավորված Ազգերի Կրթության, Գիտության և Մշակույթի Կազմակերպությանը (ՅՈՒՆԵՍԿՕ) գործուն միջոցներ ձեռնարկել կանխելու համաշխարհային մշակութային ժառանգության՝ հայկական հուշարձանների ավերումը և կերպափոխումը: Ստորագրահավաքին արդեն միացել է ավելի քան 1200 մարդ:

Թուրքիայի տարածքում գտնվող Պահլավունիների մայրաքաղաք Անին այսօր վերածվել է արոտավայրի: Ավերակների հարևանությամբ բնակվող քրդերը պատմական տարածքն օգտագործում են իրենց անասուններն արածեցնելու համար: Անիի եկեղեցիներից այսօր պահպանվել են մի քանիսը: Կանգուն են Տիգրան Հոնենցի, Հովվի եկեղեցիները, Մայր տաճարի, Հիսուս Ամենափրկչի և Սուրբ Գրիգոր եկեղեցիներից հատվածներ են մնացել, ավերակներ են պահպանվել նաև Գագկաշենից: