Արմեն Գևորգյանն ընդունել է ՀՀ-ում դիվանագիտական առաքելությունն ավարտող Չինաստանի դեսպանին

ՀՀ փոխվարչապետ, տարածքային կառավարման նախարար Արմեն Գևորգյանն այսօր' հոկտեմբերի 7-ին, ընդունել է Հայաստանում Չինաստանի Ժողովրդական Հանրապետության արտակարգ եւ լիազոր դեսպան Թիան Չանչունին' վերջինիս դիվանագիտական առաքելության ավարտի կապակցությամբ: Փոխվարչապետը հետագա հաջողությո ւններ է մաղթել դեսպանին և շնորհակալություն հայտնել վերջին տարիներին երկու երկրների միջեւ տարբեր ոլորտներում հարաբերությունների խորացմանն ու երկու բարեկամ ժողովուրդների միջև շփումների ակտիվացմանն ուղղված աշխատանքների համար:

Փոխվարչապետը գոհունակություն է հայտնել նաև ապակենտրոնացված մակարդակով համագործակցության հաստատման ուղղությամբ կատարված աշխատանքների առնչությամբ: Զրուցակիցներն ընդգծել են հետագայում այս ոլորտում գործակցության խորացման կարևորությունը՝ նկատելով, որ առկա է չիրացված մեծ ներուժ: «Վերջին տարիներին Հայաստանի և Չինաստանի միջև հարաբերություններն ավելի գործնական բնույթ են ստացել. իրականացվում են կոնկրետ ծրագրեր տարբեր՝ տնտեսական, կրթական, մշակութային ոլորտներում, որոնք նաև կոնկրետ արդյունքներ են տալիս»,-ընդգծել է փոխվարչապետը:

Դեսպանն իր հերթին նշել է, որ Հայաստանից հեռանում է խորը տպավորություններով: Նա նույնպես գոհունակությամբ է արձանագրել, որ երկու բարեկամ ժողովուրդների միջև առկա են ջերմ բարեկամական հարաբերություններ, որոնք կարևոր հիմք են հանդիսանում հարաբերությունների զարգացման համար: Նա նաև շնորհակալություն է հայտնել ՀՀ կառավարությանը՝ արդյունավետ համագործակցության և համատեղ ծրագրերի իրականացման գործում աջակցության համար:

Զրուցակիցները մտքեր են փոխանակել նաև երկկողմ հարաբերությունների զարգացման, մասնավորապես, զբոսաշրջության ոլորտում փոխգործակցության խորացման, ուղիղ օդային հաղորդակցության հաստատմանն առնչվող հարցերի շուրջ: Արմեն Գևորգյանը տեղեկություններ է ներկայացրել ենթակառուցվածքների զարգացման առաջիկա ծրագրերի մասին:

Երկկողմ հարաբերությունների խորացման գործում ունեցած անձնական ներդրման համար փոխվարչապետը դեսպանին պարգևատրել է նաև ՀՀ տարածքային կառավարման նախարարության հուշամեդալով: