Սպանված զինվոր Ալբերտ Ադիբեկյանի մայրը դիմել է «Եվրատեսիլ 2012»-ը բոյկոտած հայ երգիչ-երգչուհիներին

Տավուշի մարզի Չինարի գյուղի սահմանային դիրքերում սպանված զինվոր Ալբերտ Ադիբեկյանի մայրը դիմել է  «Եվրատեսիլ 2012»-ը բոյկոտած հայ երգիչ-երգչուհիներին.

Շատ եմ զարմանում,

Արդեն զայրանում

Մեր պատմությունից

Դասեր չքաղող

Մեր ազգի վրա,

Որ նենգ թշնամուց

Անարմատ, անդեմ այդ հրեշներից,

Դարեր շարունակ չենք տեսել երբեք

Ադամի որդուն հարիր մեկ արարք

Ու դեռ շարունակ

Մարդակերպ չարքից

Ակնկալիքներ ունենք մարդկային..

Կանգ առեք, հայեր...

Ու թե չլիներ Սահմանին զոհված

(կամ թե սպանված

Դա ամոթն է մեր,

Ամոթն է ազգիս)

Եվս մեկ զինվոր

Ախ զավակը իմ,

Պիտի ազգովի ասենք ախ ափսոս

Ու հազար ափսոս

Նրանց ազգային պատվին արժանի

Այդ որոշումը.

-Չգնալ Բաքու էն մեծ... հաճոյանալու,

Չէր կայանալու...

Ու չգիտես ինչ մոլուցքի ցավով,

Կարծրացած մտքի օրենքի դավով

Պատրաստ էին ոմանք

(Պատրաստ են ոմանք)

Մասնակից լինել

Անմեղ հայերի արյունով ներկված,

Կարմիր այդ բեմի մեծ խրախճանքին:

-Բավ չէ՞ սխալվենք

Կա՛նգ առեք, հայե՛ր..

Կրկին դավելով մեր ինքնությանը

Հայի անունի վրա դնելով

Եվս մեկ սև բիծ

Այդ խրախճանքի փողը փչելով,

Պատրաստ էին ոմանք

Նորից շրջելու պատիվը հայի,

Անիվը բախտի... Ու գիտակցաբար...

Ամոթ է..ամոթ

Կանգ առեք հայեր..

Երբ դեռ շրջում են եթերի մովում,

Մոլորված բախտից անգութ զարկված

Հոգիները դեռ...

Հոգիներն հայոց

Մորթված այդ անսիրտ,

Բիրտ գազանների

Ցնորքի զարկից...

Ամոթ է, ամոթ

Թույլ էլ չեք տալիս

(Գազաններին բիրտ)

Կրեն նեղություն,

Խնդրեն թողություն

Գալիք հայերից,

Այս թարս աշխարհից

Ու մարդկությունից:

Ամոթ է մարդիկ…

Ալբերտ Ադիբեկյանի մայրիկից

Տավուշի մարզի Չինարի գյուղի սահմանային դիրքերում սպանված զինվոր Ալբերտ Ադիբեկյանի ծնողները, դեռևս որևէ մեկնաբանություն չեն անում իրենց ողբերգության վերաբերյալ՝ քանի դեռ չկա դատաբժշկական եզրակացությունը, բայց միևնույն ժամանակ անընդունելի են համարում երգիչ-երգիչուհիների կողմից Ալբերտի անունը անհարկի շահարկելը:

Հիշեցնենք, որ Ալբերտ Ադիբեկյանի սպանությունից անմիջապես հետո ՊՆ-ն հայտարարել էր, թե զինվորին սպանել է ադրբեջանցի դիպուկահարը, իսկ հայ աստղերը հայտարարություն էին տարածել, որով դատապարտում էին Ադրբեջանի արյունարբու քաղաքականությունը և բոյկոտում էին մայիսին Բաքվում կայանալիք «Եվրատեսիլ 2012»-ը:

Հիշեցնենք նաև, որ մարտի 5-ին պաշտոնապես հաստատվել է, որ փետրվարի 23-ին Տավուշի մարզի Չինարի գյուղի պաշտպանական դիրքերում զոհված զինծառայող 20-ամյա Ալբերտ Ադիբեկյանին սպանել է ոչ թե ադրբեջանցի դիպուկահարը, այլ հայ զինծառայակիցը: